ന്യൂഡൽഹി: ബ്രിക്സ് ഉച്ചകോടിയുടെ രണ്ടാം ദിവസമായ ഞായറാഴ്ച അംഗരാജ്യങ്ങളിലെ നേതാക്കൾ ന്യൂഡൽഹിയിലെ ഭാരത് മണ്ഡപത്തിൽ വിവിധ പ്രധാന ഔട്ട്റീച്ച് പരിപാടികളിൽ പങ്കെടുക്കും. രാവിലെ 10 മണിയോടെ ബ്രിക്സ് പരിപാടികൾക്ക് തുടക്കമാകും. 10.30ഓടെ നേതാക്കളുടെ സംയുക്ത ഫോട്ടോ സെഷനും നടക്കും. ശനിയാഴ്ച ബ്രിക്സ് രാജ്യങ്ങൾ ന്യൂഡൽഹി പ്രഖ്യാപനം അംഗീകരിച്ചിരുന്നു. വ്യാപാരം, ഭീകരവാദം, കൃത്രിമ ബുദ്ധി, സ്ഥാപനപരമായ പരിഷ്കാരങ്ങൾ തുടങ്ങി വിവിധ വിഷയങ്ങളിൽ കൂട്ടായ നിലപാടുകൾ പ്രഖ്യാപനത്തിൽ ഉൾപ്പെടുത്തി. വർധിച്ചുവരുന്ന സംഘർഷങ്ങളിൽ ആശങ്ക രേഖപ്പെടുത്തിയ നേതാക്കൾ ഏകപക്ഷീയമായി ചുമത്തുന്ന താരിഫുകളെയും അപലപിച്ചു.
ബ്രിക്സ് രാജ്യങ്ങളിലെ നേതാക്കൾക്കായി പ്രധാനമന്ത്രി നരേന്ദ്ര മോദി ശനിയാഴ്ച അത്താഴവിരുന്നും സംഘടിപ്പിച്ചിരുന്നു. പങ്കെടുക്കുന്ന രാജ്യങ്ങളിലെ നേതാക്കൾക്ക് പുറമെ കേന്ദ്രമന്ത്രിമാരും വിവിധ സംസ്ഥാനങ്ങളിലെ മുഖ്യമന്ത്രിമാരും വിരുന്നിൽ പങ്കെടുത്തു. ചൈനീസ് പ്രസിഡന്റ് ഷി ജിൻപിങ്ങും അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദും വിരുന്നിൽ പങ്കെടുക്കാതിരുന്ന പ്രമുഖരിൽ ഉൾപ്പെടുന്നു.
ഞായറാഴ്ച നടക്കുന്ന രണ്ടാം ദിവസത്തെ ഉച്ചകോടിയിൽ പ്രതിരോധശേഷി, നവീകരണം, സഹകരണം, സുസ്ഥിരത തുടങ്ങിയ വിഷയങ്ങൾ കേന്ദ്രീകരിച്ചുള്ള തുറന്ന സെഷൻ നടക്കും. “പ്രതിരോധശേഷി, നവീകരണം, സഹകരണം, സുസ്ഥിരത: സമഗ്രമായ ആഗോള വളർച്ചയുടെ ഭാവി രൂപപ്പെടുത്തൽ” എന്ന പേരിലുള്ള സെഷൻ ന്യൂഡൽഹിയിലെ ഭാരത് മണ്ഡപത്തിലെ സമ്മിറ്റ് ഹാളിലാണ് നടക്കുക. സെപ്റ്റംബർ 12, 13 തീയതികളിലായി ഇന്ത്യ ആതിഥേയത്വം വഹിക്കുന്ന രണ്ടുദിവസത്തെ ബ്രിക്സ് ഉച്ചകോടിയുടെ ഭാഗമാണിത്.
താരിഫുകൾ, വ്യാപാര സംഘർഷങ്ങൾ, ഭൗമരാഷ്ട്രീയ വിഭജനം എന്നിവ ശക്തമാകുന്ന പശ്ചാത്തലത്തിലാണ് ന്യൂഡൽഹിയിൽ ഉച്ചകോടി നടക്കുന്നത്. ബ്രിക്സ് രാജ്യങ്ങൾ തമ്മിലുള്ള അതിർത്തി കടന്നുള്ള പണമിടപാടുകളും നിക്ഷേപങ്ങളും സുഗമമാക്കാനുള്ള ശ്രമങ്ങൾക്കിടെ ഏകപക്ഷീയമായ വ്യാപാര നിയന്ത്രണങ്ങൾക്കെതിരെയും നേതാക്കൾ നിലപാട് വ്യക്തമാക്കി. 2025ന്റെ തുടക്കം മുതൽ യുഎസ് പ്രസിഡന്റ് ഡോണൾഡ് ട്രംപ് വിവിധ വ്യാപാര പങ്കാളികൾക്കെതിരെ താരിഫുകൾ വർധിപ്പിച്ചിരുന്നു. വ്യാപാര ഇളവുകൾ നേടിയെടുക്കുന്നതിനും യുഎസിന്റെ വ്യാപാര അസന്തുലിതാവസ്ഥ പരിഹരിക്കുന്നതിനുമാണ് നടപടികളെന്നാണ് ട്രംപ് ഭരണകൂടത്തിന്റെ വാദം. അന്താരാഷ്ട്ര നിയമത്തിനും ഐക്യരാഷ്ട്രസഭാ ചാർട്ടറിനും വിരുദ്ധമായ “ഏകപക്ഷീയമായ നിർബന്ധിത നടപടികളെ” ബ്രിക്സ് പ്രഖ്യാപനം അപലപിക്കുകയും അവ അവസാനിപ്പിക്കണമെന്ന് ആവശ്യപ്പെടുകയും ചെയ്തു.
2020ലെ അതിർത്തി സംഘർഷത്തിന് ശേഷം ഇന്ത്യയും ചൈനയും ബന്ധം മെച്ചപ്പെടുത്തുന്നതിനുള്ള നടപടികൾ സ്വീകരിച്ചിട്ടുണ്ടെങ്കിലും പശ്ചിമേഷ്യയിലെ സംഘർഷവും അതുമൂലമുള്ള എണ്ണവ്യാപാര ഭീഷണിയും, യുക്രെയ്ൻ യുദ്ധം, യുഎസ് താരിഫുകൾ, വർധിച്ചുവരുന്ന ഭൗമരാഷ്ട്രീയ വിഭജനം തുടങ്ങിയ ആഗോള വെല്ലുവിളികൾ ഉച്ചകോടിയിൽ പ്രധാന വിഷയങ്ങളാണ്.നിലവിലെ പശ്ചിമേഷ്യൻ സംഘർഷത്തിനിടെ ഇറാന്റെ ആക്രമണങ്ങൾക്ക് ലക്ഷ്യമാകുന്ന അമേരിക്കൻ സൈനിക താവളങ്ങൾ സ്ഥിതി ചെയ്യുന്ന മേഖലയിലെ ഇറാനും യുഎഇയും ഉച്ചകോടിയിൽ പങ്കെടുക്കുന്നത് ശ്രദ്ധേയമായി.
ബ്രിക്സ് ഉച്ചകോടിക്കിടെ ഇറാൻ പ്രസിഡന്റ് മസൂദ് പെസെഷ്കിയാൻ അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനുമായി കൂടിക്കാഴ്ച നടത്തുകയും ചെയ്തു. ശനിയാഴ്ച പുറത്തിറക്കിയ ന്യൂഡൽഹി സംയുക്ത പ്രഖ്യാപനത്തിൽ പശ്ചിമേഷ്യയിലെ സംഘർഷം രൂക്ഷമാകുന്നതിൽ ബ്രിക്സ് നേതാക്കൾ “ആഴത്തിലുള്ള ആശങ്ക” രേഖപ്പെടുത്തി. പരമാവധി സംയമനം പാലിക്കണമെന്നും തർക്കങ്ങൾ സംഭാഷണത്തിലൂടെയും നയതന്ത്രത്തിലൂടെയും പരിഹരിക്കണമെന്നും നേതാക്കൾ ആവശ്യപ്പെട്ടു.
BRICS Summit 2026: On Day 2, leaders to explore opportunities for inclusive growth
