സോളാർ ഗൂഢാലോചന കേസിൽ കൊട്ടാരക്കര ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ മുൻ മന്ത്രി കെ. ബാബു മൊഴി നൽകി. കെ.ബി. ഗണേഷ് കുമാറും സോളാർ കേസ് പരാതിക്കാരിയും തമ്മിൽ ബന്ധമുണ്ടെന്ന് ബിജു രാധാകൃഷ്ണൻ മുൻ മുഖ്യമന്ത്രി ഉമ്മൻ ചാണ്ടിയോട് പറഞ്ഞിരുന്നതായി കെ. ബാബു കോടതിയിൽ വ്യക്തമാക്കി. ഉമ്മൻ ചാണ്ടി തന്നെയാണ് ഈ വിവരം തന്നോട് നേരിട്ട് സൂചിപ്പിച്ചിരുന്നതെന്നും അദ്ദേഹം കൂട്ടിച്ചേർത്തു. സോളാർ പരാതിയിൽ പേജുകൾ കൂട്ടിച്ചേർത്തതിൽ ഗൂഢാലോചനയുണ്ടെന്ന അഭിഭാഷകൻ സുധീർ ജേക്കബിന്റെ ഹർജിയിലാണ് ഈ നിർണായക മൊഴി നൽകിയിരിക്കുന്നത്.
സോളാർ തട്ടിപ്പുമായി ബന്ധപ്പെട്ട് വ്യാജരേഖ ചമച്ചെന്ന പരാതിയിൽ ഗണേഷ് കുമാറിനെതിരെ നേരത്തെ കേസ് രജിസ്റ്റർ ചെയ്തിരുന്നു. പത്തനംതിട്ട ജയിലിൽ കഴിയുarken പ്രതിക്ക് 25 പേജുള്ള കത്ത് തയ്യാറാക്കി അഡ്വ. ഫെന്നി ബാലകൃഷ്ണൻ മുഖേന കോടതിയിൽ സമർപ്പിച്ചെങ്കിലും, പിന്നീട് നൽകിയത് 21 പേജുള്ള കത്താണെന്നാണ് കേസ്. ഗൂഢാലോചനയുടെ ഭാഗമായി ഉമ്മൻചാണ്ടിയുടെ പേര് അടക്കം ഉൾപ്പെടുത്തി നാല് പേജ് കൂടി കത്തിൽ കൂട്ടിച്ചേർത്തുവെന്നാണ് പരാതിയിൽ പറയുന്നത്. മന്ത്രിസഭയിൽ നിന്ന് ഒഴിവാക്കിയതിലുള്ള വ്യക്തിവിരോധം തീർക്കാനാണ് ഗണേഷ് വ്യാജരേഖ ചമച്ചതെന്നും പരാതിയിൽ വ്യക്തമാക്കുന്നു.
ഉമ്മൻചാണ്ടിക്കെതിരെയും മറ്റ് മന്ത്രിമാർക്കെതിരെയും ഗുരുതര ആരോപണങ്ങൾ ഉന്നയിച്ചുള്ള കത്ത് വ്യാജമാണെന്നും, ഇതിന് പിന്നിൽ ഒരു എം.എൽ.എ.യും സഹായികളുമാണെന്ന് പ്രതിയുടെ മുൻ അഭിഭാഷകനായ ഫെന്നി ബാലകൃഷ്ണൻ പിന്നീട് മൊഴി നൽകിയിരുന്നു. ജയിലിൽ വെച്ച് പ്രതി എഴുതിയ കത്തിൽ ഉമ്മൻചാണ്ടിക്കെതിരെ ഒരു ആരോപണവും ഉണ്ടായിരുന്നില്ലെന്നും കത്തിൽ വ്യക്തമാക്കിയിരുന്നു. മുൻ മുഖ്യമന്ത്രി ഉമ്മൻചാണ്ടിയെ ലൈംഗികാതിക്രമ കേസിൽ കുടുക്കുമെന്ന് കെ.ബി. ഗണേഷ് കുമാർ പറഞ്ഞിരുന്നതായി ഗണേഷിന്റെ മുൻ പേഴ്സണൽ സ്റ്റാഫ് അംഗം സുധീർ മലയിലും ഇതിനുമുമ്പ് കോടതിയിൽ മൊഴി നൽകിയിരുന്നു.
സോളാർ കേസിലെ ഗൂഢാലോചനക്കേസിലെ നാലാം സാക്ഷിയാണ് സുധീർ മലയിൽ. ഗണേഷ് കുമാർ പരാതിക്കാരിയുമായി അടുത്ത ബന്ധം പുലർത്തിയിരുന്നെന്നും മന്ത്രിയുടെ ഔദ്യോഗിക വസതികളിലും ഓഫീസുകളിലും അവർ നിത്യസന്ദർശകയായിരുന്നുവെന്നും സുധീർ മൊഴി നൽകിയിട്ടുണ്ട്. ഉമ്മൻചാണ്ടി മന്ത്രിസഭയിൽ മന്ത്രിയായിരുന്ന ഗണേഷ് കുമാറിന് ഭാര്യ നൽകിയ ഗാർഹിക പീഡന പരാതിയിന്മേൽ മന്ത്രിസ്ഥാനം രാജിവെക്കേണ്ടിവന്നിരുന്നു. 2013 ഏപ്രിൽ രണ്ടിനാണ് ഗണേഷ് കുമാർ മന്ത്രിസ്ഥാനത്തുനിന്നും രാജി വെച്ചത്.
Solar Conspiracy Case: K. Babu Gives Statement Against K.B. Ganesh Kumar
