മുഖ്യമന്ത്രി വി.ഡി. സതീശനെ സോഷ്യൽ മീഡിയയിലൂടെ അപമാനിച്ചെന്ന പരാതിയിൽ സസ്പെൻഷനിലായ സ്കൂൾ പ്രിൻസിപ്പലിന് വിരമിക്കൽ ദിനത്തിൽ ആശ്വാസം. സസ്പെൻഷൻ നടപടി അടിയന്തരമായി പിൻവലിക്കാൻ മുഖ്യമന്ത്രി നൽകിയ നിർദ്ദേശം ഒറ്റദിവസം കൊണ്ട് നടപ്പിലായതോടെയാണ് ആറ്റിങ്ങൽ മോഡൽ ഹയർ സെക്കൻഡറി സ്കൂൾ പ്രിൻസിപ്പൽ എസ്. ജവാദിന് ആശ്വാസകരമായ വിരമിക്കലിന് വഴിയൊരുങ്ങിയത്.
കഴിഞ്ഞ ദിവസമാണ് പുറമേ നിന്നുള്ള ഒരു പരാതിയുടെ അടിസ്ഥാനത്തിൽ ജവാദിനെതിരെ വിദ്യാഭ്യാസ വകുപ്പ് സസ്പെൻഷൻ നടപടി സ്വീകരിച്ചത്. എന്നാൽ ഈ വിഷയത്തിൽ മുഖ്യമന്ത്രിയോ അദ്ദേഹത്തിന്റെ ഓഫീസോ യാതൊരുവിധ പരാതിയും നൽകിയിരുന്നില്ല. വിരമിക്കാൻ ദിവസങ്ങൾ മാത്രം ബാക്കിനിൽക്കെ ഒരു അധ്യാപകനെതിരെ ഇത്തരം കടുത്ത വകുപ്പുതല നടപടി ഉണ്ടായത് ഒഴിവാക്കാനാണ് മുഖ്യമന്ത്രി നേരിട്ട് ഇടപെട്ടത്.
മുഖ്യമന്ത്രിയുടെ നിർദ്ദേശത്തെ തുടർന്ന് പൊതുവിദ്യാഭ്യാസ ഡയറക്ടർ സസ്പെൻഷൻ പിൻവലിച്ചുകൊണ്ട് ഇന്ന് പുതിയ ഉത്തരവിറക്കുകയായിരുന്നു. മാനുഷിക പരിഗണന മുൻനിർത്തിയാണ് നടപടി പിൻവലിക്കുന്നതെന്ന് ഉത്തരവിൽ വ്യക്തമാക്കുന്നുണ്ട്. വിരമിക്കൽ ദിവസം തന്നെ സസ്പെൻഷൻ മാറിയത് അധ്യാപകനും കുടുംബത്തിനും വലിയ ആശ്വാസമായി.
Suspension of School Principal Revoked on Retirement Day Following CM VD Satheesan’s Intervention
