മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള ഡൽഹിയിലെ പ്രതിഷേധത്തിൽ പങ്കെടുത്ത ശേഷം തിരുവനന്തപുരത്ത് തിരിച്ചെത്തിയ പ്രതിപക്ഷ നേതാവ് പിണറായി വിജയന് സി.പി.എം പ്രവർത്തകർ ഉജ്ജ്വല സ്വീകരണം നൽകി. തിരുവനന്തപുരം വിമാനത്താവളത്തിൽ വന്നിറങ്ങിയ അദ്ദേഹത്തെ ‘കണ്ണേ കരളേ പിണറായി’ എന്ന മുദ്രാവാക്യം വിളികളോടെ വലിയ ജനക്കൂട്ടവും പാർട്ടി പ്രവർത്തകരും ചേർന്നാണ് സ്വീകരിച്ചത്. സി.പി.എം സംസ്ഥാന സെക്രട്ടറി എം.വി. ഗോവിന്ദൻ ഉൾപ്പെടെയുള്ള മുതിർന്ന നേതാക്കളും വിമാനത്താവളത്തിൽ അദ്ദേഹത്തോടൊപ്പം ഉണ്ടായിരുന്നു.
ഡൽഹിയിൽ വെച്ച് ഇന്നലെ രാവിലെ പത്തരയോടെയാണ് പിണറായി വിജയനെ പോലീസ് കസ്റ്റഡിയിലെടുത്തത്. എട്ടു മണിക്കൂറോളം തടഞ്ഞുവെച്ച ശേഷം രാത്രി ഏഴുമണിയോടെയാണ് അദ്ദേഹത്തെ വിട്ടയച്ചത്. കസ്റ്റഡിയിലെടുത്ത ശേഷം മൂന്നര മണിക്കൂറോളം നഗരത്തിൽ വാഹനത്തിൽ വട്ടംകറക്കിയ ശേഷമാണ് മന്ദിർ മാർഗ് പോലീസ് സ്റ്റേഷനിൽ എത്തിച്ചതെന്ന് ഒപ്പമുണ്ടായിരുന്ന നേതാക്കൾ ആരോപിച്ചു. വയോധികനായ നേതാവിന് കൃത്യസമയത്ത് ഭക്ഷണവും മരുന്നും ലഭിക്കാതെ വന്നതോടെ ശാരീരിക അസ്വസ്ഥതകൾ അനുഭവപ്പെട്ടതായും, തികച്ചും മോശമായ രീതിയിലാണ് ഡൽഹി പോലീസ് പെരുമാറിയതെന്നും നേതാക്കൾ വിമർശിച്ചു.
അതേസമയം, മോശം പെരുമാറ്റത്തിനും സുരക്ഷാ വീഴ്ചകൾക്കുമെതിരെ പോലീസ് സ്റ്റേഷനിൽ നിന്നും പുറത്തിറങ്ങിയ പിണറായി വിജയൻ രൂക്ഷമായ ഭാഷയിലാണ് പ്രതികരിച്ചത്. എന്തിനാണ് മണിക്കൂറുകളോളം തങ്ങളെ വാഹനത്തിൽ കറക്കിയതെന്നും ഇത്തരം വിചിത്ര നടപടികൾ കൊണ്ട് ജനകീയ പ്രതിഷേധങ്ങളെ തണുപ്പിക്കാമെന്ന് ഭരണകൂടം കരുതേണ്ടെന്നും അദ്ദേഹം തുറന്നടിച്ചു. ഗ്യാനേഷ് കുമാർ രാജിവെക്കുന്നതുവരെ പോരാട്ടം തുടരുമെന്നും കൂടുതൽ ശക്തമായ പ്രക്ഷോഭങ്ങൾക്ക് രാജ്യം സാക്ഷ്യം വഹിക്കുമെന്നും അദ്ദേഹം കൂട്ടിച്ചേർത്തു.
Warm Welcome for Pinarayi Vijayan in Thiruvananthapuram After 8-Hour Delhi Police Custody
