കേന്ദ്ര സർക്കാരിന്റെ വിവിധ ബില്ലുകൾക്കെതിരെ അതിശക്തമായ പ്രമേയം പാസാക്കി തമിഴ്നാട് നിയമസഭ. മണ്ഡല പുനർനിർണ്ണയ ബിൽ പൂർണ്ണമായും പിൻവലിക്കണമെന്ന് ആവശ്യപ്പെടുന്ന പ്രമേയം നിയമസഭ ഏകകണ്ഠമായാണ് പാസാക്കിയത്. തമിഴ്നാട് മുഖ്യമന്ത്രി ജോസഫ് വിജയ്യാണ് സഭയിൽ പ്രമേയം അവതരിപ്പിച്ചത്. എഫ്സിആർഎ ബില്ലിനും നീറ്റിനുമെതിരെ കഴിഞ്ഞ ദിവസങ്ങളിൽ തമിഴ്നാട് പ്രമേയം പാസാക്കിയിരുന്നു. ലോക്സഭയുടെ നിലവിലെ അംഗസംഖ്യയായ 543 ആയി തന്നെ തുടരണമെന്നാണ് തമിഴ്നാടിന്റെ പ്രധാന ആവശ്യമെന്ന് മുഖ്യമന്ത്രി ചൂണ്ടിക്കാട്ടി.
കോൺഗ്രസ്, ഇടതുപക്ഷ പാർട്ടി പ്രതിനിധികൾ ഉൾപ്പെടെയുള്ള ഭരണകക്ഷി സഖ്യത്തിന്റെ നിർണ്ണായക യോഗത്തിന് ശേഷമാണ് പ്രമേയം സഭയിലെത്തിയത്. നിലവിലുള്ള 543 മണ്ഡലങ്ങളെ അടിസ്ഥാനമാക്കി 2029-ലെ ലോക്സഭാ തിരഞ്ഞെടുപ്പിൽ തന്നെ സ്ത്രീകൾക്കുള്ള 33 ശതമാനം സംവരണം നടപ്പിലാക്കാൻ കേന്ദ്രത്തോടാവശ്യപ്പെടുന്നതാണ് പ്രമേയം. തമിഴ്നാട്ടിൽ പുരുഷന്മാരേക്കാൾ കൂടുതൽ സ്ത്രീകൾ വോട്ട് ചെയ്തിട്ടുണ്ടെന്നും, സംവരണം എന്നത് ഔദാര്യമല്ല മറിച്ച് സാമൂഹിക നീതിയുടെ വിഷയമാണെന്നും പ്രമേയം അവതരിപ്പിച്ചുകൊണ്ട് ജോസഫ് വിജയ് വ്യക്തമാക്കി.
കഴിഞ്ഞ അഞ്ച് പതിറ്റാണ്ടിലേറെയായി ജനസംഖ്യ കണക്കാക്കാത്ത സാഹചര്യത്തിൽ, 2011-ലെ സെൻസസ് അടിസ്ഥാനമാക്കി മണ്ഡലങ്ങൾ പുനർനിർണ്ണയിക്കണമെന്നും സഭ ആവശ്യപ്പെട്ടു. ലോക്സഭയിലെയും നിയമസഭയിലെയും അംഗങ്ങളുടെ എണ്ണം 550-ൽ നിന്ന് 850-ലേക്ക് ഉയർത്തണമെന്നും പ്രമേയം വ്യക്തമാക്കുന്നു. സഖ്യകക്ഷികളിലെയും സൗഹൃദ പാർട്ടികളിലെയും എംപിമാർ പങ്കെടുത്ത യോഗത്തിൽ ദക്ഷിണേന്ത്യൻ സംസ്ഥാനങ്ങളുടെ താല്പര്യങ്ങൾ സംരക്ഷിക്കാൻ പ്രമേയം പാസാക്കണമെന്ന് തീരുമാനിച്ചിരുന്നു. അതേസമയം പ്രമുഖ പ്രതിപക്ഷ പാർട്ടികളായ ഡിഎംകെയും എഐഎഡിഎംകെയും ഈ നീക്കങ്ങളെ വിമർശിച്ച് യോഗം ബഹിഷ്കരിക്കുകയാണ് ഉണ്ടായത്.
നിയമനിർമ്മാണ സഭകളിൽ സ്ത്രീകൾക്ക് സംവരണം ഉറപ്പാക്കുന്ന ‘നാരി ശക്തി വന്ദൻ അധിനിയം’ ബില്ലിന്റെ തുടർനടപടികൾ മുൻപ് ലോക്സഭയിൽ ഭരണഘടനാ ഭേദഗതി ബിൽ പരാജയപ്പെട്ടതോടെ തടസ്സപ്പെട്ടിരുന്നു. സ്ത്രീ സംവരണത്തെ മണ്ഡല പുനർനിർണ്ണയവുമായി ബന്ധിപ്പിക്കുന്നതിനെതിരെ വലിയ എതിർപ്പാണ് പ്രതിപക്ഷ പാർട്ടികളിൽ നിന്നും ഉയരുന്നത്. ഈ സാഹചര്യത്തിൽ തമിഴ്നാട് സഭ പാസാക്കിയ പുതിയ പ്രമേയം ദേശീയ രാഷ്ട്രീയത്തിൽ വലിയ ചർച്ചകൾക്ക് വഴിതുറക്കും.
Tamil Nadu Assembly passes resolution against Central Bills: Demands withdrawal of Delimitation Bill
