വാഷിംഗ്ടൺ: യുഎസും ഇറാനും തമ്മിലുള്ള ചരിത്രപരമായ സമാധാന കരാർ അന്തിമമാക്കുന്നതിനോട് ഇരുരാജ്യങ്ങളും ഏറ്റവും അടുത്തെത്തിയതായി അമേരിക്കൻ പ്രസിഡന്റ് ഡോണൾഡ് ട്രംപ്. പ്രമുഖ മാധ്യമമായ സിബിഎസ് ന്യൂസിന് നൽകിയ പ്രത്യേക അഭിമുഖത്തിലാണ് ചർച്ചകളിലെ നിർണായക പുരോഗതി ട്രംപ് പരസ്യമാക്കിയത്. ഓരോ ദിവസം കഴിയുന്തോറും ചർച്ചകൾ കൂടുതൽ മികച്ച രീതിയിലാണ് മുന്നോട്ട് പോകുന്നതെന്നും അദ്ദേഹം കൂട്ടിച്ചേർത്തു.
ഇരുരാജ്യങ്ങളും തമ്മിൽ രൂപപ്പെടുന്ന പുതിയ കരാറിലൂടെ ഇറാന്റെ പക്കലുള്ള സമ്പുഷ്ടീകരിച്ച യുറേനിയം പൂർണ്ണമായും സുരക്ഷിതമായി കൈകാര്യം ചെയ്യുമെന്നും അതിനുള്ള വഴികൾ തെളിഞ്ഞിട്ടുണ്ടെന്നും പ്രസിഡന്റ് വ്യക്തമാക്കി. എങ്കിലും ഈ വിഷയത്തിലെ കൂടുതൽ തന്ത്രപ്രധാനമായ നയതന്ത്ര വിവരങ്ങൾ വെളിപ്പെടുത്താൻ അദ്ദേഹം തയ്യാറായില്ല.
അതേസമയം, അമേരിക്ക മുന്നോട്ടുവെച്ച എല്ലാ ആവശ്യങ്ങളും പൂർണ്ണമായി അംഗീകരിക്കുന്ന ഒരു കരാറിൽ മാത്രമേ താൻ ഒപ്പുവെക്കുകയുള്ളൂ എന്ന കർശന നിലപാടും ട്രംപ് ആവർത്തിച്ചു. ഇതോടെ വരും ദിവസങ്ങളിൽ യുഎസിന്റെ നിബന്ധനകൾക്ക് വിധേയമായി ഇറാനുമായി വലിയൊരു നയതന്ത്ര ഉടമ്പടി ഉണ്ടാകുമെന്ന സൂചനയാണ് പുറത്തുവരുന്നത്.
