ലണ്ടൻ: ഇംഗ്ലണ്ടിലെ സ്കൂളുകളിൽ മൊബൈൽ ഫോൺ ഉപയോഗം നിയന്ത്രിക്കുന്നത് നിയമപരമാക്കാൻ തീരുമാനിച്ച് യു.കെ. സർക്കാർ . Children’s Wellbeing and Schools Bill ൽ ഭേദഗതി കൊണ്ടുവന്ന് നിലവിലെ മാർഗ്ഗനിർദ്ദേശങ്ങളെ കർശനമായ നിയമമായി മാറ്റുകയാണ് ലക്ഷ്യം. സ്കൂളുകൾ ഫോൺ ഉപയോഗം നിർബന്ധമായും നിയന്ത്രിക്കണമെന്നത് “സംശയത്തിനതീതമായി ഉറപ്പാക്കുക” എന്നതാണ് സർക്കാരിന്റെ ഉദ്ദേശമെന്നും നിലവിൽ സ്കൂളുകൾക്ക് ഫോൺ ഉപയോഗം നിയന്ത്രിക്കാൻ നിർദ്ദേശം മാത്രമാണുള്ളതെന്നും വിദ്യാഭ്യാസ മന്ത്രി ജാക്ക്വി സ്മിത്ത് ലോർഡ്സ് സഭയിൽ അറിയിച്ചു.
എന്നാൽ പുതിയ നിയമപ്രകാരം, എല്ലാ സ്കൂളുകളും വ്യക്തമായ ഫോൺ നയം രൂപീകരിക്കുകയും അത് കർശനമായി നടപ്പാക്കുകയും വേണം. വിദ്യാർത്ഥികൾക്കും രക്ഷിതാക്കൾക്കും ഈ നിയമങ്ങൾ വ്യക്തമായി അറിയിക്കണമെന്നും നിർബന്ധമാകും. നിയമലംഘനം നടത്തുന്ന വിദ്യാർത്ഥികളെ ശാസിക്കുന്നതിന് ഹെഡ്ടീച്ചർമാർക്ക് കൂടുതൽ നിയമ പിന്തുണ ലഭിക്കും. സ്കൂൾ പെരുമാറ്റ നയങ്ങൾ പരിശോധനകളിലും പരിഗണിക്കപ്പെടുമെന്നും ജാക്ക്വി സ്മിത്ത് ലോർഡ്സ് കൂട്ടിച്ചേർത്തു.
എല്ലാ സ്കൂളുകളിലും ഏകീകൃതവും വ്യക്തവുമായ മാനദണ്ഡങ്ങൾ ഉറപ്പാക്കാനാണ് ഈ നീക്കമെന്ന് വിദ്യാഭ്യാസ സെക്രട്ടറി ബ്രിഡ്ജറ്റ് ഫിലിപ്പ്സൺ വ്യക്തമാക്കി. പൂർണ്ണദിന വിലക്ക് ഉൾപ്പെടെ കർശന നിയന്ത്രണം. രാജ്യവ്യാപകമായി ഒരേ രീതിയിലുള്ള വിലക്ക് നിർബന്ധമല്ലെങ്കിലും, സ്കൂളുകൾ കർശന നിയന്ത്രണം നടപ്പാക്കണം. പല സ്കൂളുകളും പൂർണ്ണദിന വിലക്ക് ഏർപ്പെടുത്താൻ സാധ്യതയുണ്ട്. ഇടവേളകളിലും ഫോൺ ഉപയോഗം അനുവദിക്കില്ല. ചില സ്കൂളുകൾ വിദ്യാർത്ഥികളിൽ നിന്ന് രാവിലെ തന്നെ ഫോണുകൾ ശേഖരിച്ച് സുരക്ഷിതമായി സൂക്ഷിക്കുകയും, ക്ലാസ് കഴിഞ്ഞ് തിരികെ നൽകുകയും ചെയ്യാം. ലോക്കറുകൾ അല്ലെങ്കിൽ ലോക്കുചെയ്ത പൗച്ചുകൾ ഉപയോഗിക്കുന്ന രീതികളും പരിഗണനയിലാണ്.
ഫോൺ കൊണ്ടുവരാൻ അനുമതി നൽകിയാലും, ക്ലാസ് മുറികളിലും ഇടനാഴികളിലും കളിസ്ഥലങ്ങളിലും ഉപയോഗം സാധാരണയായി വിലക്കപ്പെടും. പ്രത്യേക വിദ്യാഭ്യാസ ആവശ്യങ്ങൾക്കോ അടിയന്തര സാഹചര്യങ്ങളിലോ മാത്രം ഇളവ് നൽകും. കുട്ടികളിൽ സ്മാർട്ട്ഫോൺ ഉപയോഗം വർധിച്ചതിനെ തുടർന്നുള്ള ആശങ്കകളാണ് ഈ തീരുമാനത്തിന് പിന്നിൽ. മൊബൈൽ ഫോണുകൾ വിദ്യാർത്ഥികളുടെ ശ്രദ്ധ തെറ്റിക്കുകയും ക്ലാസുകൾ തടസ്സപ്പെടുത്തുകയും ചെയ്യുന്നതായി വിദ്യാഭ്യാസ വകുപ്പ് വ്യക്തമാക്കുന്നു.
സൈബർ ബുള്ളിയിംഗ്, സാമൂഹിക സമ്മർദ്ദം, അധിക സ്ക്രീൻ സമയം എന്നിവ കുട്ടികളുടെ മാനസികാരോഗ്യത്തെ ബാധിക്കുന്നതായും വിലയിരുത്തൽ. “ക്ലാസ് മുറികളിൽ ഫോണുകൾക്ക് സ്ഥാനം ഇല്ല,” എന്നാണ് ബ്രിഡ്ജറ്റ് ഫിലിപ്പ്സൺ പറഞ്ഞത്. പഠനത്തിനായി ശാന്തവും ശ്രദ്ധ കേന്ദ്രീകൃതവുമായ അന്തരീക്ഷം സൃഷ്ടിക്കുകയാണ് ലക്ഷ്യമെന്നും അവർ കൂട്ടിച്ചേർത്തു. നിയമം സ്കൂളുകളുടെ അധികാരം ശക്തിപ്പെടുത്തുന്നുവെങ്കിലും, പ്രായോഗികമായി ചില വെല്ലുവിളികൾ നിലനിൽക്കുന്നു. ഫോണുകൾ സൂക്ഷിക്കാൻ ആവശ്യമായ സംവിധാനങ്ങൾ ഒരുക്കേണ്ടതും നിയമം കർശനമായി നടപ്പാക്കേണ്ടതും സ്കൂളുകളുടെ ഉത്തരവാദിത്തമായിരിക്കും.
കൂടുതൽ ധനസഹായമില്ലാതെ സുരക്ഷിത സംഭരണ സൗകര്യങ്ങൾ ഒരുക്കുന്നത് ചില സ്കൂളുകൾക്ക് ബുദ്ധിമുട്ടാകാമെന്ന് വിദ്യാഭ്യാസ വിദഗ്ധർ ചൂണ്ടിക്കാട്ടുന്നു. വിഭവങ്ങളും സ്കൂളുകളുടെ വലിപ്പവും അനുസരിച്ച് നിയമ നടപ്പാക്കൽ വ്യത്യാസപ്പെടാമെന്ന ആശങ്കയും നിലനിൽക്കുന്നു. എങ്കിലും, പുതിയ നിയമം മാതാപിതാക്കളുമായുള്ള തർക്കങ്ങൾ കുറയ്ക്കുകയും അധ്യാപകർക്ക് കൂടുതൽ ആത്മവിശ്വാസത്തോടെ ശാസനം നടപ്പാക്കാൻ സഹായിക്കുമെന്നും സർക്കാർ വിലയിരുത്തുന്നു. കുട്ടികളുടെ ഡിജിറ്റൽ ഉപയോഗം നിയന്ത്രിക്കുന്നതിന്റെ ഭാഗമായുള്ള വലിയ പദ്ധതിയുടെ തുടർച്ചയായാണ് ഈ നീക്കം.
UK government introduces new law banning mobile phones in schools in England
