തിരുവനന്തപുരം: രാജ്യത്ത് ബി.ജെ.പിക്കും മുഖ്യതിരഞ്ഞെടുപ്പ് കമ്മിഷണർ ഗ്യാനേഷ് കുമാറിനുമെതിരെ കോൺഗ്രസും പോഷക സംഘടനകളും ആർജവത്തോടെ സമരം ചെയ്യുമ്പോൾ കേരളത്തിലെ സി.പി.എം എന്തിനാണ് അസ്വസ്ഥരാകുന്നതെന്ന് മുഖ്യമന്ത്രി വി.ഡി. സതീശൻ. സംഘ്പരിവാറിനെതിരായ പ്രതിഷേധങ്ങളിൽ സി.പി.എമ്മിന് പൊള്ളുന്നത് എന്തുകൊണ്ടാണെന്നും അദ്ദേഹം ചോദിച്ചു. തിരുവനന്തപുരത്തുണ്ടായ അക്രമ സംഭവങ്ങൾ ആസൂത്രിതമാണെന്ന് വ്യക്തമാക്കിയ മുഖ്യമന്ത്രി, സംസ്ഥാനത്ത് കലാപ അന്തരീക്ഷം സൃഷ്ടിക്കാൻ ശ്രമിച്ചാൽ കടുത്ത നിയമനടപടികൾ നേരിടേണ്ടി വരുമെന്ന് മുന്നറിയിപ്പ് നൽകി.
തിരുവനന്തപുരത്ത് യൂത്ത് കോൺഗ്രസ് പ്രവർത്തകർ നടത്തിയ സമരത്തിന് നേരെ സി.പി.എം നേതൃത്വത്തിന്റെ അറിവോടെയാണ് അക്രമ സംഭവങ്ങൾ അരങ്ങേറിയതെന്ന് മുഖ്യമന്ത്രി ആരോപിച്ചു. എസ്.എഫ്.ഐ പ്രവർത്തകർ മനഃപൂർവം പ്രകോപനം സൃഷ്ടിക്കുകയായിരുന്നു. തുടർന്ന് പ്രതിഷേധിച്ചവർക്ക് നേരെ ബിയർ കുപ്പികളും കല്ലും വലിച്ചെറിയുന്ന സാഹചര്യമുണ്ടായി. കഴിഞ്ഞ ഏതാനും ദിവസങ്ങളായി യുവമോർച്ചയും ബി.ജെ.പിയും നാട്ടിലെ സമാധാന അന്തരീക്ഷം തകർക്കാൻ ശ്രമിക്കുകയാണ്. അതിന്റെ തുടർച്ച തന്നെയാണ് തിരുവനന്തപുരത്ത് സി.പി.എമ്മും എസ്.എഫ്.ഐയും കാട്ടിയതെന്നും മുഖ്യമന്ത്രി പറഞ്ഞു. സി.പി.എമ്മും ബി.ജെ.പിയും ഒരേ തൂവൽ പക്ഷികളാണെന്ന് ഈ സംഭവങ്ങളിലൂടെ ഒരിക്കൽ കൂടി തെളിഞ്ഞിരിക്കുകയാണെന്നും അദ്ദേഹം കൂട്ടിച്ചേർത്തു.
ഒരു തരത്തിലുള്ള അക്രമ പ്രവർത്തനങ്ങളും സർക്കാർ അനുവദിക്കില്ലെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. ജനങ്ങളുടെ സമാധാന ജീവിതം ഇല്ലാതാക്കാൻ ആര് ശ്രമിച്ചാലും അവർക്കെതിരെ വിട്ടുവീഴ്ചയില്ലാത്തതും ശക്തവുമായ നിയമ നടപടികൾ സ്വീകരിക്കുമെന്നും അദ്ദേഹം ഭരണകൂടത്തിന്റെ നിലപാട് വ്യക്തമാക്കി.
Why is the CPM uneasy about the protest against the BJP? V.D. Satheesan warns of strong action if attempts are made to incite unrest.
