ലണ്ടൻ: ലോകകപ്പ് ഫുട്ബോൾ ടൂർണമെൻ്റുകളുടെ ഓഹരികൾ സ്വകാര്യ നിക്ഷേപകർക്ക് വിൽക്കാനുള്ള വിവാദ പദ്ധതി അന്താരാഷ്ട്ര ഫുട്ബോൾ ഫെഡറേഷൻ (ഫിഫ) ഉപേക്ഷിച്ചു. വിവിധ വൻകരകളിലെ ഫുട്ബോൾ സംഘടനകളിൽ നിന്നും അംഗരാജ്യങ്ങളിൽ നിന്നും ഉയർന്ന ശക്തമായ എതിർപ്പിനെത്തുടർന്നാണ് ഫിഫ പ്രസിഡൻ്റ് ജിയാനി ഇൻഫാൻ്റിനോ പദ്ധതി പൂർണ്ണമായും റദ്ദാക്കുന്നതായി പ്രഖ്യാപിച്ചത്. ഈ നീക്കം ഫുട്ബോളിൽ വലിയ ഭിന്നതകൾക്ക് കാരണമായെന്നും അതിനാൽ പദ്ധതിയുമായി മുന്നോട്ട് പോകുന്നില്ലെന്നും ഇൻഫാൻ്റിനോ വ്യക്തമാക്കി.
‘ഫിഫ ഫോർവേഡ് എന്റർപ്രൈസ്’ (FFE) എന്ന പേരിൽ പുതിയ വാണിജ്യ ഉപകമ്പനി രൂപീകരിച്ച് ലോകകപ്പ് മത്സരങ്ങളുടെ ന്യൂനപക്ഷ ഓഹരികൾ വിൽക്കാനായിരുന്നു ഫിഫയുടെ നീക്കം. ഇതിനായി അമേരിക്കൻ വെഞ്ച്വർ ക്യാപിറ്റൽ സ്ഥാപനമായ ‘ത്രൈവ് എറ്റേണലുമായി’ ചർച്ചകൾ നടത്തിവരികയായിരുന്നു. പദ്ധതിയെ പിന്തുണയ്ക്കുന്ന 211 അംഗരാജ്യങ്ങൾക്ക് 40 ദശലക്ഷം ഡോളർ (ഏകദേശം 330 കോടിയിലധികം രൂപ) വീതം ഫിഫ വാഗ്ദാനം ചെയ്തിരുന്നു.
എന്നാൽ യൂറോപ്യൻ ഫുട്ബോൾ സംഘടനയായ ‘യുവേഫ’ പദ്ധതി നടപ്പിലാക്കിയാൽ ലോകകപ്പ് ബഹിഷ്കരിക്കുമെന്ന് പ്രഖ്യാപിച്ചു. തൊട്ടുപിന്നാലെ വടക്കേ അമേരിക്കൻ സംഘടനയായ കൺകകാഫും, ഏഷ്യൻ ഫുട്ബോൾ കോൺഫെഡറേഷനും യുവേഫയ്ക്ക് പിന്തുണ പ്രഖ്യാപിച്ച് രംഗത്തെത്തി. ഇതോടെ ആകെ 211 അംഗങ്ങളിൽ 136 രാജ്യങ്ങൾ പദ്ധതിക്ക് എതിരായി മാറുന്ന സാഹചര്യം വന്നു. ഫിഫയിലെ ഭൂരിപക്ഷമായ 106 വോട്ടുകൾ നേടാൻ കഴിയില്ലെന്ന് ഉറപ്പായതോടെയാണ് ഇൻഫാൻ്റിനോ പിൻവാങ്ങിയത്.
പദ്ധതി ഫുട്ബോളിൻ്റെ ഭാവിയെ പണയപ്പെടുത്തുന്നതാണെന്ന് ആരോപിച്ച് ഇൻഫാൻ്റിനോയുടെ സീനിയർ ഉപദേശകൻ കാർലോസ് കോർഡീറോ രാജിവെച്ചു. ഫിഫ ഭരണകൂടം തന്നെ ഈ പദ്ധതിയെക്കുറിച്ച് തെറ്റിദ്ധരിക്കപ്പെടുകയായിരുന്നു എന്ന് ഫിഫ ചീഫ് ഓപ്പറേറ്റിംഗ് ഓഫീസർ കെവിൻ ലാമൂർ വെളിപ്പെടുത്തി.
വരുന്ന മാർച്ചിൽ നടക്കുന്ന ഫിഫ കോൺഗ്രസിൽ നാലാം തവണയും പ്രസിഡൻ്റ് സ്ഥാനത്തേക്ക് മത്സരിക്കാൻ ഒരുങ്ങുന്ന ജിയാനി ഇൻഫാൻ്റിനോയ്ക്ക് ഈ സംഭവം കനത്ത തിരിച്ചടിയും കടുത്ത സമ്മർദ്ദവുമാണ് സമ്മാനിക്കുന്നത്. വരും ദിവസങ്ങളിൽ എല്ലാ ഫുട്ബോൾ കൂട്ടായ്മകളെയും ഒരുമിച്ചിരുത്തി ചർച്ചകൾ നടത്തുമെന്നും അദ്ദേഹം അറിയിച്ചു.
World Cup stake sale fails; FIFA abandons controversial plan due to deep divisions, a major setback for Infantino
