ന്യൂഡല്ഹി: ഇന്ത്യന് വിമാനക്കമ്പനികള് നടത്തുന്ന വിമാനങ്ങള്ക്ക് ആറ് ദിവസത്തിനുള്ളില് 70 ബോംബ് ഭീഷണികള് ലഭിച്ച സാഹചര്യത്തില്, ഏവിയേഷന് സേഫ്റ്റി ബോഡി ബ്യൂറോ ഓഫ് സിവില് ഏവിയേഷന് സെക്യൂരിറ്റി (ബിസിഎഎസ്) ഉദ്യോഗസ്ഥര് എയര്ലൈനുകളുടെ ചീഫ് എക്സിക്യൂട്ടീവ് ഓഫീസര്മാരുമായി (സിഇഒ) കൂടിക്കാഴ്ച നടത്തി. ശനിയാഴ്ച ഡല്ഹിയിലെ രാജീവ് ഗാന്ധി ഭവനിലെ വ്യോമയാന മന്ത്രാലയത്തിന്റെ ഓഫീസിലാണ് കൂടിക്കാഴ്ച നടന്നത്.
യോഗത്തില്, യാത്രക്കാര്ക്ക് അസൗകര്യവും വാഹകര്ക്ക് നഷ്ടവും ഉണ്ടാക്കുന്ന ഭീഷണികള് നേരിടാന് സ്റ്റാന്ഡേര്ഡ് ഓപ്പറേറ്റിംഗ് നടപടിക്രമം (എസ്ഒപി) പാലിക്കാന് സിഇഒമാരോട് ആവശ്യപ്പെട്ടതായി ഉദ്യോഗസ്ഥര് വ്യക്തമാക്കി. ഭീഷണികളെക്കുറിച്ചും സ്വീകരിച്ച നടപടികളെക്കുറിച്ചും അറിയിക്കാനും ആവശ്യപ്പെട്ടിട്ടുണ്ട്.
ശനിയാഴ്ച മാത്രം വിവിധ വിമാനക്കമ്പനികള് നടത്തുന്ന വിമാനങ്ങള്ക്ക് നേരെ 30 ലധികം ബോംബ് ഭീഷണികളാണ് ഉയര്ന്നത്. ഇതുവരെയുള്ള അന്വേഷണത്തില്, ലണ്ടന്, ജര്മ്മനി, കാനഡ, യുഎസ് എന്നിവിടങ്ങളില് നിന്നുള്ള ഐപി (ഇന്റര്നെറ്റ് പ്രോട്ടോക്കോള്) വിലാസങ്ങളില് നിന്നാണ് ഈ ആഴ്ച ചില ഭീഷണികള് വന്നതെന്ന് കണ്ടെത്തിയതായി ഉദ്യോഗസ്ഥര് പറഞ്ഞു. അതേസമയം, തങ്ങളുടെ യഥാര്ത്ഥ ലൊക്കേഷനുകള് മറയ്ക്കാന് ഭീഷണിയുടെ പിന്നിലുള്ളവര് വിപിഎന് ഉപയോഗിക്കുന്നതിലെ സാധ്യതയും തള്ളിക്കളഞ്ഞില്ല.
