കൊൽക്കത്തയിലെ ഈഡൻ ഗാർഡൻസിൽ ദക്ഷിണാഫ്രിക്കയെ വീഴ്ത്താൻ ഒരുക്കിയ സ്പിൻ പിച്ച് ഇന്ത്യയ്ക്ക് തന്നെ കനത്ത തിരിച്ചടിയായി. പരമ്പരയിലെ ആദ്യ ടെസ്റ്റിൽ 30 റൺസിന്റെ ദയനീയ പരാജയമാണ് ടീം ഇന്ത്യ വഴങ്ങിയത്. 124 റൺസിന്റെ വിജയലക്ഷ്യം പിന്തുടർന്ന ഇന്ത്യ 93 റൺസിന് ഓൾഔട്ടായി. സൈമൺ ഹാർമർ നാല് വിക്കറ്റുകളും മാർക്കോ യാൻസനും കേശവ് മഹാരാജും രണ്ട് വിക്കറ്റ് വീതവും വീഴ്ത്തി ദക്ഷിണാഫ്രിക്കയെ മുന്നിലെത്തിച്ചു. ഇതോടെ പരമ്പരയിൽ പ്രോട്ടീസ് 1-0ന് മുൻതൂക്കം നേടി.
ഇന്ത്യൻ ഇന്നിങ്സിന്റെ തകർച്ച നാലാം പന്ത് മുതൽ ആരംഭിച്ചു. യശസ്വി ജയ്സ്വാൾ (0), കെ.എൽ. രാഹുൽ (1) എന്നിവരെ തുടക്കത്തിലേ മാർക്കോ യാൻസൻ മടക്കിയതോടെ സ്കോർബോർഡ് ഞെട്ടി. മൂന്നാം വിക്കറ്റിൽ വാഷിങ്ടൺ സുന്ദറും ധ്രുവ് ജുറെലും 32 റൺസ് കൂട്ടിച്ചേർത്ത് പ്രതീക്ഷ നൽകി. എന്നാൽ ഹാർമറിന്റെ പന്തിൽ അനാവശ്യ ഷോട്ടിന് ശ്രമിച്ച ജുറെൽ (13) പുറത്തായതോടെ തകർച്ച ആരംഭിച്ചു. ഋഷഭ് പന്ത് (2) പെട്ടെന്ന് മടങ്ങി.
അഞ്ചാം വിക്കറ്റിൽ രവീന്ദ്ര ജഡേജയെ (18) കൂട്ടുപിടിച്ച് സുന്ദർ 26 റൺസ് ചേർത്ത് പിടിച്ചുനിന്നു. എന്നാൽ ഹാർമർ ഈ കൂട്ടുകെട്ടും പൊളിച്ചു. നിലയുറപ്പിച്ച സുന്ദറിനെ (31) ഏയ്ഡൻ മാർക്രം മടക്കിയതോടെ ഇന്ത്യ 72/6 എന്ന നിലയിലായി. കുൽദീപ് യാദവ് (1) പുറത്തായി. അക്ഷർ പട്ടേൽ (26) രണ്ട് സിക്സടിച്ച് സ്കോർ ഉയർത്താൻ ശ്രമിച്ചെങ്കിലും മഹാരാജിന്റെ പന്തിൽ ബവുമയ്ക്ക് ക്യാച്ച് നൽകി. അടുത്ത പന്തിൽ മുഹമ്മദ് സിറാജിനെയും മടക്കി മഹാരാജ് ജയം പൂർത്തിയാക്കി.
രണ്ടാം ദിനം കഴുത്തിന് പരിക്കേറ്റ് മടങ്ങിയ ക്യാപ്റ്റൻ ശുഭ്മൻ ഗില്ലിന് ബാറ്റിങ് നടത്താനാകാത്തതും ഇന്ത്യയ്ക്ക് തിരിച്ചടിയായി. ദക്ഷിണാഫ്രിക്കയുടെ രണ്ടാം ഇന്നിങ്സ് 153 റൺസിൽ അവസാനിച്ചു. ക്യാപ്റ്റൻ ടെംബ ബവുമ (55*) അർധസെഞ്ചുറിയോടെ പ്രതിരോധം തീർത്തു. എട്ടാം വിക്കറ്റിൽ കോർബിൻ ബോഷുമായി (25) 44 റൺസ് ചേർത്തു. ജസ്പ്രീത് ബുംറ ബോഷിനെ പുറത്താക്കി കൂട്ടുകെട്ട് പൊളിച്ചു. ഇന്ത്യൻ ബൗളർമാരിൽ രവീന്ദ്ര ജഡേജ നാല് വിക്കറ്റും കുൽദീപ് യാദവും മുഹമ്മദ് സിറാജും രണ്ട് വിക്കറ്റ് വീതവും വീഴ്ത്തി. ഹാർമറിനെയും മഹാരാജിനെയും സിറാജ് മടക്കി ഇന്നിങ്സ് അവസാനിപ്പിച്ചു. 92 പന്തിൽ 31 റൺസെടുത്ത വാഷിങ്ടൺ സുന്ദറാണ് ഇന്ത്യയിൽ ഏറ്റവും കൂടുതൽ നേരം പിടിച്ചുനിന്നത്. ഈ പരാജയം ഇന്ത്യൻ ക്യാമ്പിനെ ഞെട്ടിച്ചിരിക്കുകയാണ്.
