ബി.ജെ.പി. നേതാവ് ദുഷ്യന്ത് കുമാർ ഗൗതമിനെ സിക്കിം ഗവർണറായി നിയമിച്ചതിൽ പ്രതിഷേധിച്ച് ഡൽഹി ഇന്ത്യാ ഗേറ്റിൽ പ്രതിഷേധം നടത്തുന്ന അങ്കിത ഭണ്ഡാരിയുടെ മാതാപിതാക്കളെ ലോക്സഭാ പ്രതിപക്ഷ നേതാവ് രാഹുൽ ഗാന്ധിയും പ്രിയങ്ക ഗാന്ധിയും നേരിട്ടെത്തി കണ്ടു. രാഹുലും പ്രിയങ്കയും എത്തിയതോടെ ഇന്ത്യാ ഗേറ്റിലെ പ്രതിഷേധം മിന്നൽ സമരമായി മാറി. ഉത്തരാഖണ്ഡിലെ ഒരു റിസോർട്ടിൽ റിസപ്ഷനിസ്റ്റായിരുന്ന അങ്കിത ഭണ്ഡാരി 2022 സെപ്റ്റംബറിലാണ് കൊല്ലപ്പെട്ടത്. ഈ കൊലപാതക കേസിൽ മുൻ ബി.ജെ.പി. നേതാവ് വിനോദ് ആര്യയുടെ മകനും റിസോർട്ട് ഉടമയുമായ പുൽകിത് ആര്യയും മറ്റ് രണ്ടുപേരും കുറ്റക്കാരാണെന്ന് കോടതി കണ്ടെത്തുകയും ജീവപര്യന്തം ശിക്ഷ വിധിക്കുകയും ചെയ്തിരുന്നു.
എന്നാൽ ഈ കേസിൽ ഒരു വി.ഐ.പി. കൂടി ഉൾപ്പെട്ടിട്ടുണ്ടെന്നായിരുന്നു പ്രധാന ആരോപണം. ബി.ജെ.പി. ദേശീയ ജനറൽ സെക്രട്ടറിയും ഉത്തരാഖണ്ഡിന്റെ ചുമതലയുണ്ടായിരുന്ന നേതാവുമായ ദുഷ്യന്ത് കുമാർ ഗൗതമിന്റെ പേരാണ് ഇതുമായി ബന്ധപ്പെട്ട് മുൻപ് ഉയർന്നുവന്നിരുന്നത്. കേസിൽ സി.ബി.ഐ. അന്വേഷണം പൂർത്തിയാകുന്നതുവരെ ദുഷ്യന്ത് ഗൗതമിനെ ഗവർണറായി നിയമിക്കരുതെന്നാണ് അങ്കിതയുടെ കുടുംബത്തിന്റെ ആവശ്യം. രാഷ്ട്രപതിയും കേന്ദ്ര സർക്കാരും അദ്ദേഹത്തിന്റെ നിയമനം തടയണമെന്ന് ആവശ്യപ്പെട്ടാണ് മാതാപിതാക്കൾ ഇന്ത്യാ ഗേറ്റിൽ പ്രതിഷേധം സംഘടിപ്പിച്ചത്. തങ്ങളുടെ ആശങ്കകൾ നേരിട്ട് അറിയിക്കുന്നതിനായി രാഷ്ട്രപതി ദ്രൗപദി മുർമുവിനെ കാണാൻ സമയം തേടിയിട്ടുണ്ടെന്നും, ആവശ്യം അംഗീകരിച്ചില്ലെങ്കിൽ ഡെഹ്‌റാഡൂണിലെ ഉത്തരാഖണ്ഡ് മുഖ്യമന്ത്രിയുടെ ഓഫീസിന് മുന്നിൽ നിരാഹാര സമരം നടത്തുമെന്നും അവർ മുന്നറിയിപ്പ് നൽകിയിട്ടുണ്ട്.
തിങ്കളാഴ്ചയാണ് ദുഷ്യന്ത് കുമാർ ഗൗതമിനെ സിക്കിം ഗവർണറായി നിയമിച്ചത്. ഗൗതമിനെ സംരക്ഷിക്കാനാണ് ഈ പദവി നൽകിയിരിക്കുന്നതെന്ന് കോൺഗ്രസ് ആരോപിച്ചു. ഗവർണർ പദവിയിലിരിക്കെ ഒരാൾക്കെതിരെ ക്രിമിനൽ നടപടികൾ സ്വീകരിക്കാനാകില്ലെന്നതാണ് ഇതിന് കാരണമായി കോൺഗ്രസ് ചൂണ്ടിക്കാണിക്കുന്നത്. അങ്കിതയുടെ മാതാപിതാക്കളുടെ സമരത്തിന് പൂർണ്ണ പിന്തുണയുമായാണ് രാഹുൽ ഗാന്ധിയും പ്രിയങ്ക ഗാന്ധിയും സ്ഥലത്തെത്തി ഐക്യദാർഢ്യം പ്രഖ്യാപിച്ചത്.
Ankita Bhandari’s Parents Protest Sikkim Governor Appointment; Rahul and Priyanka Visit Them at India Gate
