സമൂഹമാധ്യമങ്ങളിൽ തരംഗമായ പെൺകുട്ടിയുടെ വിവാഹവുമായി ബന്ധപ്പെട്ട കേസിൽ നിർണ്ണായക വഴിത്തിരിവ്. വിവാഹത്തിൽ പങ്കെടുത്ത രാഷ്ട്രീയ നേതാക്കളെ പ്രതിപ്പട്ടികയിൽ ഉൾപ്പെടുത്തണമെന്ന സ്വകാര്യ ഹർജി തിരുവനന്തപുരം പോക്സോ കോടതി സ്റ്റേ ചെയ്തു. പെൺകുട്ടിക്ക് വിവാഹസമയത്ത് പ്രായപൂർത്തിയായിട്ടില്ലെന്ന ആരോപണത്തെത്തുടർന്നാണ് കേസ് ഉയർന്നുവന്നത്. എന്നാൽ രാഷ്ട്രീയ നേതാക്കളെ ഉൾപ്പെടുത്താനുള്ള നീക്കം കോടതി തടയുകയായിരുന്നു.
വിവാഹം നടക്കുമ്പോൾ പെൺകുട്ടിക്ക് 18 വയസ്സ് കഴിഞ്ഞിരുന്നുവെന്നാണ് പ്രോസിക്യൂഷൻ കോടതിയിൽ വാദിച്ചത്. പെൺകുട്ടിയുടെ സഹോദരന്റെ സർട്ടിഫിക്കറ്റ് ഉപയോഗിച്ച് ബാഹ്യസമ്മർദ്ദത്താൽ വീട്ടുകാർ വ്യാജരേഖയുണ്ടാക്കിയതാണെന്നും പ്രോസിക്യൂഷൻ കോടതിയെ അറിയിച്ചു. പെൺകുട്ടി പ്രായപൂർത്തിയായ വ്യക്തിയാണെന്നും അതുകൊണ്ടുതന്നെ വിവാഹം നിയമപരമാണെന്നുമാണ് ഔദ്യോഗിക നിലപാട്.
അതേസമയം, പ്രായപൂർത്തിയായിട്ടില്ലെന്ന പരാതിയിൽ മധ്യപ്രദേശ് പൊലീസിനോട് കോടതി വിശദീകരണം തേടിയിട്ടുണ്ട്. കേസിൽ വ്യാജരേഖ ചമച്ചതുൾപ്പെടെയുള്ള ആരോപണങ്ങളിൽ കൂടുതൽ വ്യക്തത വരുത്താനാണ് കോടതി നിർദ്ദേശം. രാഷ്ട്രീയ നേതാക്കളെ അനാവശ്യമായി കേസിൽ വലിച്ചിഴയ്ക്കാൻ ശ്രമം നടക്കുന്നുണ്ടോ എന്നും കോടതി പരിശോധിക്കുന്നുണ്ട്. വരും ദിവസങ്ങളിൽ മധ്യപ്രദേശ് പൊലീസ് നൽകുന്ന റിപ്പോർട്ട് കേസിലെ തുടർനടപടികളിൽ നിർണ്ണായകമാകും.
Court stays move to implead political leaders in viral girl’s wedding case
