ചെങ്ങന്നൂർ: രാജ്യത്തെ എൻഫോഴ്സ്മെന്റ് ഡയറക്ടറേറ്റ് (ഇ.ഡി) രാഷ്ട്രീയമായ നീക്കങ്ങളാണ് നടത്തിവരുന്നതെന്നും അതിനെ രാഷ്ട്രീയമായിത്തന്നെ നേരിടുമെന്നും പ്രതിപക്ഷ നേതാവ് പിണറായി വിജയൻ. കരുവന്നൂർ ബാങ്കിലെ അഴിമതിയുമായി ബന്ധപ്പെട്ട ഇ.ഡി ഇടപെടലുകൾ ചൂണ്ടിക്കാട്ടിയായിരുന്നു അദ്ദേഹത്തിന്റെ പ്രതികരണം. എക്സാലോജിക്-സി.എം.ആർ.എൽ ഇടപാടിൽ പിണറായി വിജയൻ അഴിമതി നടത്തിയെന്ന റിപ്പോർട്ട് കഴിഞ്ഞ ദിവസം ഇ.ഡി സംസ്ഥാന പോലീസ് മേധാവിക്ക് കൈമാറിയ പശ്ചാത്തലത്തിൽ കൂടിയായിരുന്നു ഈ പ്രതികരണം. എന്നാൽ ചെങ്ങന്നൂരിൽ നടന്ന പരിപാടിയിൽ തനിക്കെതിരായ കേസിനെക്കുറിച്ച് നേരിട്ട് പ്രതികരിക്കാൻ അദ്ദേഹം തയ്യാറായില്ല.
കരുവന്നൂർ വിഷയത്തിൽ ഇ.ഡി നടത്തുന്ന നീക്കങ്ങളെ രൂക്ഷമായി വിമർശിച്ച പിണറായി വിജയൻ, ബാങ്കിൽ തെറ്റായ നടപടികൾ സ്വീകരിച്ചപ്പോൾ അതിനെതിരെ ശക്തമായ നടപടിയാണ് എൽ.ഡി.എഫ് സർക്കാർ സ്വീകരിച്ചതെന്ന് വ്യക്തമാക്കി. എന്നാൽ അന്വേഷണ ഏജൻസിയായ ഇ.ഡി വിഷയത്തിൽ ഇടപെട്ട് ഒരു രാഷ്ട്രീയ പാർട്ടിയെ പ്രതിയാക്കുകയാണ് ചെയ്തത്. രാജ്യത്ത് ആദ്യമായിട്ടാണ് ഇത്തരമൊരു സംഭവം ഉണ്ടാകുന്നത്. സ്ഥാപനത്തിൽ അഴിമതി നടത്തിയവരെ കണ്ടെത്തുകയും അവർക്കെതിരെ നടപടിയെടുക്കുകയും ചെയ്തപ്പോഴാണ് ഇ.ഡി കടന്നുവന്നതെന്നും അദ്ദേഹം കൂട്ടിച്ചേർത്തു.
തട്ടിപ്പ് നടത്തിയ ചിലരെ സ്വാധീനിച്ച് മാപ്പുസാക്ഷികളാക്കുകയാണ് ഇ.ഡി ചെയ്തതെന്ന് പിണറായി ആരോപിച്ചു. ഇഡിയോ അവരെ പിന്നിൽനിന്ന് നയിക്കുന്നവരോ ഉദ്ദേശിക്കുന്ന കാര്യങ്ങളാണ് ഈ ആളുകളെക്കൊണ്ട് പറയിപ്പിക്കുന്നത്. കേരളത്തിലെ സഹകരണ മേഖലയാകെ അഴിമതിയുടെ കേന്ദ്രമാണെന്ന് വരുത്തിത്തീർക്കാനാണ് ശ്രമം നടന്നത്. തൃശ്ശൂർ ജില്ലയിൽ സി.പി.എമ്മിന്റെ ജില്ലാ സെക്രട്ടറിമാരായി വന്നവരെല്ലാം പ്രതികളാക്കപ്പെടുന്ന സാഹചര്യമാണുണ്ടായത്. അന്വേഷണ ഏജൻസികൾ നടത്തുന്ന ഇത്തരം രാഷ്ട്രീയ നീക്കങ്ങളെ രാഷ്ട്രീയമായിത്തന്നെ നേരിടുമെന്നും അദ്ദേഹം വ്യക്തമാക്കി.
ED Executing Political Moves, Will Face It Politically: Leader of Opposition Pinarayi Vijayan
