തൊടുപുഴ/പത്തനംതിട്ട: സംസ്ഥാനത്ത് കനത്ത നാശനഷ്ടം വിതച്ചുകൊണ്ട് മലയോര മേഖലകളിൽ ശക്തമായ മഴ തുടരുന്നു. ഇടുക്കി ജില്ലയിൽ രണ്ടിടത്ത് ഉരുൾപൊട്ടലുണ്ടായതായാണ് ഏറ്റവും പുതിയ വിവരങ്ങൾ. തൊടുപുഴയ്ക്ക് സമീപമുള്ള മുട്ടം ചള്ളാവയൽ, കുടയത്തൂർ അടൂർമല എന്നിവിടങ്ങളിലാണ് ഉരുൾപൊട്ടൽ റിപ്പോർട്ട് ചെയ്തിരിക്കുന്നത്. അടൂർമലയിലുണ്ടായ ശക്തമായ മലവെള്ളപ്പാച്ചിലിൽ ഒരു വീട് പൂർണ്ണമായും തകർന്നു. ഇവിടെ നിന്നും രണ്ടുപേരെ പരിക്കുകളോടെ രക്ഷപ്പെടുത്തിയെങ്കിലും, പ്രദേശവാസിയായ ഒരു സ്ത്രീയെ കാണാതായിട്ടുണ്ട്. ഇവർക്കായുള്ള തെരച്ചിൽ ഫയർഫോഴ്സും നാട്ടുകാരും ചേർന്ന് ഊർജ്ജിതമായി തുടരുകയാണ്.
മുട്ടം ചള്ളാവയലിൽ ജലനിരപ്പ് ഉയർന്നതിനെ തുടർന്ന് വീടുകൾക്കുള്ളിൽ ആളുകൾ കുടുങ്ങിക്കിടക്കുന്നതായും റിപ്പോർട്ടുകളുണ്ട്. കരിങ്കുന്നം നെല്ലാപ്പാറയിൽ രണ്ടിടത്ത് മണ്ണിടിച്ചിലുണ്ടായി. വാഗമണ്ണിൽ വീടിന് മുകളിലേക്ക് മണ്ണിടിഞ്ഞ് വീണ് ഒരാൾ കുടുങ്ങിക്കിടക്കുകയാണ്. പത്തനംതിട്ട ജില്ലയിലെ തണ്ണിത്തോട് തൂമ്പാക്കുളത്തും ഉരുൾപൊട്ടിയതായി സംശയമുണ്ട്. സ്ഥിരീകരിച്ചിട്ടില്ല. തൂമ്പാക്കുളം ജംക്ഷനിൽ വലിയ തോതിൽ ചെളിയും മരങ്ങളും അടിഞ്ഞുകൂടിയ നിലയിലാണ്. പമ്പയാറ്റിൽ ജലനിരപ്പ് അപകടകരമായ രീതിയിൽ ഉയർന്നതിനെ തുടർന്ന് മൂഴിയാർ അണക്കെട്ടിൽ റെഡ് അലർട്ട് പ്രഖ്യാപിച്ചു.
കോട്ടയം ജില്ലയിലെ പുല്ലകയാർ കരകവിഞ്ഞൊഴുകിയതോടെ കൊക്കയാർ ചപ്പാത്ത് പൂർണ്ണമായും വെള്ളത്തിനടിയിലായി. ഇവിടെയുള്ള ആറോളം വീടുകളിൽ വെള്ളം കയറിയതിനെ തുടർന്ന് താമസക്കാരെ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. മുണ്ടക്കയം കോസ്വേ വെള്ളത്തിൽ മുങ്ങിയ അവസ്ഥയിലാണ്. കൂട്ടിക്കൽ, കാഞ്ഞിരപ്പള്ളി തുടങ്ങിയ പ്രദേശങ്ങളിലും വലിയ തോതിൽ വെള്ളക്കെട്ട് രൂപപ്പെട്ടിട്ടുണ്ട്. ഈരാറ്റുപേട്ട ടൗണിൽ രാത്രി അപ്രതീക്ഷിത വെള്ളപ്പൊക്കമുണ്ടായി. ടൗണിലൂടെ വാഹനങ്ങൾ കടന്നുപോകില്ല. 2018 ൽ വന്നതിനേക്കാൾ കൂടുതൽ ഉയരത്തിലാണ് ടൗണിൽ വെള്ളം കയറിയത് എന്ന് രക്ഷാപ്രവർത്തകർ പറയുന്നു. നടക്കൽ മുരിക്കോലി ഭാഗങ്ങളിലും വെള്ളം കയറി. നിരവധി വീടുകൾ വെള്ളത്തിലായി. വീടിന്റെ രണ്ടാം നിലയിൽ കുടുങ്ങിയവരെ രക്ഷാപ്രവർത്തകർ നിലവിൽ പുറത്ത് എത്തിച്ചു കൊണ്ടിരിക്കുകയാണ്.
തീരദേശ-മലയോര മേഖലകളിൽ ഉള്ളവർ അതീവ ജാഗ്രത പാലിക്കണമെന്നും, നദിക്കരകളിൽ താമസിക്കുന്നവർ സുരക്ഷിത സ്ഥാനങ്ങളിലേക്ക് മാറണമെന്നും ദുരന്തനിവാരണ അതോറിറ്റി മുന്നറിയിപ്പ് നൽകി. കൂടുതൽ ദുരിതാശ്വാസ ക്യാമ്പുകൾ തുറക്കാനുള്ള നടപടികൾ തദ്ദേശഭരണകൂടങ്ങൾ ആരംഭിച്ചിട്ടുണ്ട്.
Heavy rains in Idukki and Pathanamthitta; Landslides in two places in Idukki, one woman missing, high alert in coastal and hilly areas
