സി.പി.എം. വിശാല സംസ്ഥാന സമിതി യോഗത്തിൽ പാർട്ടി സംസ്ഥാന സെക്രട്ടറി എം.വി. ഗോവിന്ദന് പരസ്യ ശാസന. മാധ്യമങ്ങളെ കൈകാര്യം ചെയ്യുന്നതിലും പരസ്യ പ്രസ്താവനകൾ നടത്തുന്നതിലും വീഴ്ച പറ്റി എന്ന വിലയിരുത്തലിന്റെ അടിസ്ഥാനത്തിലാണ് പി.ബി. ഇടപെട്ട് നടപടിയെടുത്തത്. സംസ്ഥാന സെക്രട്ടറിക്കെതിരെ പാർട്ടി തലത്തിൽ ഇത്തരമൊരു നടപടിയുണ്ടാകുന്നത് അപൂർവ്വമാണ്. കൂട്ടായ നേതൃത്വവും വ്യക്തിപരമായ ഉത്തരവാദിത്തവും നിർവ്വഹിക്കുന്നതിൽ ഗോവിന്ദന് വീഴ്ച പറ്റിയെന്നും അദ്ദേഹത്തിന്റെ ചില നിലപാടുകൾ പാർട്ടിയെ വലിയ തോതിൽ പ്രതിരോധത്തിലാക്കിയെന്നും യോഗത്തിൽ വിമർശനമുയർന്നു.
കഴിഞ്ഞ ലോക്സഭ, തദ്ദേശ, നിയമസഭ തിരഞ്ഞെടുപ്പുകളിൽ പാർട്ടിക്കുണ്ടായ ദയനീയ പരാജയങ്ങൾക്ക് കാരണം സംഘടനാതലത്തിലുണ്ടായ വീഴ്ചകളാണെന്ന് സമിതി വിലയിരുത്തി. കൂടാതെ തളിപ്പറമ്പിൽ ഗോവിന്ദന്റെ ഭാര്യയുടെ സ്ഥാനാർത്ഥിത്വം സംബന്ധിച്ച തർക്കത്തിൽ കണ്ണൂർ ജില്ലാ കമ്മിറ്റി സംസ്ഥാന സെക്രട്ടറിക്കെതിരെ നിലപാട് സ്വീകരിച്ചിരുന്നു. സ്ഥാനാർത്ഥിത്വത്തിൽ വീഴ്ച പറ്റിയെന്ന സംസ്ഥാന കമ്മിറ്റിയുടെ വിലയിരുത്തൽ തള്ളിയ ജില്ലാ കമ്മിറ്റി, അതിന്റെ പൂർണ്ണ ഉത്തരവാദിത്തം സംസ്ഥാന സെക്രട്ടറിക്കാണെന്ന് തുറന്നടിച്ചതും യോഗത്തിൽ വലിയ ചർച്ചയായി.
അതേസമയം യോഗത്തിൽ തനിക്കെതിരെ വിമർശനങ്ങൾ ഉയർന്നതായി എം.വി. ഗോവിന്ദൻ സ്ഥിരീകരിച്ചെങ്കിലും ശാസനയെക്കുറിച്ചുള്ള ചോദ്യങ്ങളോട് നേരിട്ട് പ്രതികരിക്കാൻ തയ്യാറായില്ല. കാര്യങ്ങൾ പാർട്ടിയുടെ ആഭ്യന്തരവും സംഘടനാപരവുമായ വിഷയം മാത്രമാണെന്നും താൻ ഉൾപ്പെടെയുള്ളവർക്ക് പറ്റിയ തെറ്റുകൾ ചർച്ച ചെയ്തിട്ടുണ്ടെന്നും അദ്ദേഹം വ്യക്തമാക്കി. തെറ്റുകൾ തിരുത്തി പാർട്ടി സമഗ്രമായ മുന്നേറ്റത്തിലേക്ക് കടക്കുമെന്നും അദ്ദേഹം കൂട്ടിച്ചേർത്തു.
CPM State Committee Cautions MV Govindan Over Organizational Lapses and Statement Controversies
