ന്യൂഡൽഹി: സാധാരണക്കാരായ യാത്രക്കാരെ ആകർഷിക്കുന്നതിനും കുറഞ്ഞ ചെലവിൽ വിമാനയാത്ര സാധ്യമാക്കുന്നതിനുമായി എയർ ഇന്ത്യ പുതിയ ‘ബേസിക്’ ടിക്കറ്റ് നിരക്ക് കാറ്റഗറി അവതരിപ്പിച്ചു. തിരഞ്ഞെടുത്ത ആഭ്യന്തര റൂട്ടുകളിലെ ഇക്കണോമി ക്ലാസ് യാത്രക്കാർക്കാണ് ഈ പുതിയ നിരക്ക് ബാധകമാക്കിയിരിക്കുന്നത്. കൂടുതൽ യാത്രക്കാരെ ആകർഷിക്കുന്നതിനൊപ്പം ടിക്കറ്റ് നിരക്കിൽ മികച്ച ഇളവുകൾ നൽകുക കൂടിയാണ് ഈ പുതിയ നീക്കത്തിലൂടെ കമ്പനി ലക്ഷ്യമിടുന്നത്.
വിമാനത്തിനുള്ളിലെ സൗജന്യ ഭക്ഷണ സേവനം ഈ ബേസിക് നിരക്കിൽ ഉൾപ്പെടുത്തിയിട്ടില്ല. ഏറ്റവും കുറഞ്ഞ നിരക്കിൽ യാത്ര ചെയ്യാൻ ആഗ്രഹിക്കുന്ന ബഡ്ജറ്റ് യാത്രക്കാരെ ലക്ഷ്യമിട്ടാണ് ഈ മാറ്റം കൊണ്ടുവന്നിരിക്കുന്നത്. സാധാരണ ബഡ്ജറ്റ് എയർലൈനുകളിൽ നിന്ന് വ്യത്യസ്തമായി, ഈ കുറഞ്ഞ നിരക്കിലും യാത്രക്കാർക്ക് സൗജന്യമായി 15 കിലോഗ്രാം ചെക്ക്-ഇൻ ബാഗേജും 7 കിലോഗ്രാം ക്യാബിൻ ബാഗേജും കൊണ്ടുപോകാൻ സാധിക്കും. കൂടാതെ, യാത്രക്കാർക്ക് ചായയോ കാപ്പിയോ അടക്കമുള്ള പാനീയങ്ങളും സൗജന്യമായി ലഭിക്കും.
നിലവിൽ പരീക്ഷണാടിസ്ഥാനത്തിൽ തിരഞ്ഞെടുത്ത റൂട്ടുകളിൽ മാത്രമാണ് ഈ പുതിയ നിരക്ക് ലഭ്യമാക്കിയിട്ടുള്ളത്. എയർ ഇന്ത്യയുടെ ഔദ്യോഗിക വെബ്സൈറ്റ്, മൊബൈൽ ആപ്പ്, കോൺടാക്റ്റ് സെന്ററുകൾ, എയർപോർട്ട് ടിക്കറ്റിംഗ് ഓഫീസുകൾ എന്നിവ വഴി മാത്രമായി ഇപ്പോൾ ഈ ടിക്കറ്റുകൾ ബുക്ക് ചെയ്യാൻ സാധിക്കും.
ഈ പുതിയ ‘ബേസിക്’ ഫെയറിന് പുറമെ, സൗജന്യ ഭക്ഷണവും മറ്റ് പ്രീമിയം സേവനങ്ങളും ആവശ്യമുള്ള യാത്രക്കാർക്കായി ‘വാല്യൂ’ , ‘ക്ലാസിക്’, ‘ഫ്ലെക്സ്’ എന്നീ നിലവിലുള്ള ടിക്കറ്റ് കാറ്റഗറികളും എയർ ഇന്ത്യ തുടർന്നും ലഭ്യമാക്കുമെന്ന് അറിയിച്ചിട്ടുണ്ട്.
Huge discount on air ticket prices; Air India’s new announcement surprises passengers!
