കുവൈത്ത് സിറ്റി: അമേരിക്കൻ ആക്രമണങ്ങൾക്ക് മറുപടിയായി ഇറാൻ തൊടുത്തുവിട്ട ഡ്രോൺ പതിച്ച് കുവൈത്തിലെ പാർപ്പിട സമുച്ചയത്തിൽ വൻ തീപിടിത്തം. കുവൈത്ത് ക്യാപിറ്റൽ ഗവർണറേറ്റിലെ ജനവാസ മേഖലയിലാണ് സംഭവം. എന്നാൽ ആക്രമണത്തിൽ ആർക്കും പരിക്കേറ്റിട്ടില്ലെന്നും ഭൗതിക നാശനഷ്ടങ്ങൾ മാത്രമാണ് ഉണ്ടായിട്ടുള്ളതെന്നും കുവൈത്ത് ഫയർ ഫോഴ്സ് ഔദ്യോഗികമായി സ്ഥിരീകരിച്ചു.
ബുധനാഴ്ച പുലർച്ചെയോടെയായിരുന്നു സംഭവം. മേഖലയിൽ ഇറാൻ നടത്തിയ മിസൈൽ-ഡ്രോൺ ആക്രമണങ്ങളിൽ ഒന്നിന്റെ അവശിഷ്ടങ്ങളാണ് ജനവാസ മേഖലയിലെ കെട്ടിടത്തിന് മുകളിൽ പതിച്ചത്. തീപിടിത്തമുണ്ടായ ഉടൻ തന്നെ അൽ ഹിലാലി, അൽ മദീന ഫയർ സ്റ്റേഷനുകളിൽ നിന്നുള്ള അഗ്നിശമന സേനാംഗങ്ങൾ സ്ഥലത്തെത്തി രക്ഷാപ്രവർത്തനം ആരംഭിക്കുകയും തീ പൂർണ്ണമായും നിയന്ത്രണവിധേയമാക്കുകയും ചെയ്തു. കെട്ടിടത്തിലുണ്ടായിരുന്നവരെ സുരക്ഷിതമായി ഒഴിപ്പിച്ചു.
ഇറാനിൽ നിന്ന് കുവൈത്തിന് നേരെ വന്ന ഭൂരിഭാഗം ഡ്രോണുകളെയും മിസൈലുകളെയും കുവൈത്തിന്റെ ശക്തമായ വ്യോമ പ്രതിരോധ സംവിധാനങ്ങൾ (Air Defense Systems) തകർത്തു കളഞ്ഞതായി കുവൈത്ത് സായുധ സേന അറിയിച്ചു. അതിർത്തികളിൽ സുരക്ഷയും നിരീക്ഷണവും ശക്തമാക്കിയിട്ടുണ്ട്. നിലവിലെ സാഹചര്യത്തിൽ രാജ്യത്ത് കനത്ത ജാഗ്രതാ നിർദേശം പുറപ്പെടുവിച്ചിട്ടുണ്ടെന്നും, ജനങ്ങൾ പരിഭ്രാന്തരാകാതെ ഔദ്യോഗിക സുരക്ഷാ നിർദേശങ്ങൾ മാത്രം പാലിക്കണമെന്നും അധികൃതർ ആവശ്യപ്പെട്ടു.
Iranian drone attack: Fire breaks out at residential complex in Kuwait; no casualties
