ദുബായ്: ദുബായിൽ നിന്നും ഇസ്രായേലിലെ ടെൽ അവീവിലേക്ക് പറന്ന ഫ്ലൈദുബായ് വിമാനത്തിൽ ക്യാപ്റ്റനെ ആക്രമിക്കുകയും വിമാനം തകർക്കാൻ ശ്രമിക്കുകയും ചെയ്ത കോ-പൈലറ്റിനെക്കുറിച്ച് ഞെട്ടിക്കുന്ന വിവരങ്ങൾ പുറത്ത്. ഒമാൻ സ്വദേശിയായ കോ-പൈലറ്റ് ഹമാം അൽ-ഹമ്മാമിക്ക് തീവ്ര ആശയങ്ങളുണ്ടെന്ന സംശയത്തെ തുടർന്ന് ഒമാൻ എയർലൈൻസ് ഇയാളെ മുൻപ് ജോലിയിൽ നിന്ന് വിലക്കിയിരുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ഇയാളുടെ തീവ്ര ആശയങ്ങളെയും സുരക്ഷാ ഭീഷണിയെയും കുറിച്ച് മുൻപ് തന്നെ ഒമാൻ അധികൃതർക്ക് സൂചന ലഭിച്ചിരുന്നു. വിവാദപരമായ പശ്ചാത്തലത്തെ തുടർന്ന് ഒമാൻ എയർലൈൻസ് ഇയാളെ പൈലറ്റ് ജോലിയിൽ പ്രവേശിക്കുന്നതിൽ നിന്ന് മുൻപ് വിലക്കുകയും സുരക്ഷാ റിസ്ക് ഉള്ള വ്യക്തിയായി അടയാളപ്പെടുത്തുകയും ചെയ്തിരുന്നു. എന്നാൽ ഈ അതീവ രഹസ്യ വിവരങ്ങൾ ഒമാൻ ഭരണകൂടം അന്താരാഷ്ട്ര ഏവിയേഷൻ ഏജൻസികളുമായോ ഫ്ലൈദുബായുമായോ പങ്കുവെക്കാതിരുന്നതാണ് ഇപ്പോൾ വലിയ സുരക്ഷാ വീഴ്ചയായി മാറിയിരിക്കുന്നത്. സുരക്ഷാ ഭീഷണിയുള്ള വ്യക്തിയായി ഒമാൻ അധികൃതർ അടയാളപ്പെടുത്തിയ ഇയാൾ എങ്ങനെയാണ് പിന്നീട് ഫ്ലൈദുബായിൽ ജോലിയിൽ പ്രവേശിച്ചതെന്ന കാര്യം വ്യക്തമല്ല.
സെപ്റ്റംബർ 30-നായിരുന്നു ലോകത്തെ നടുക്കിയ സംഭവം അരങ്ങേറിയത്. 170-ലധികം യാത്രക്കാരുമായി പറന്ന ഫ്ലൈദുബായ് ഫ്ലൈറ്റ് 1073-ൽ വെച്ച് ഹമാം അൽ-ഹമ്മാമി വിമാനത്തിലെ ക്യാപ്റ്റനായ സ്മിത് മച്ഛറിനെ പെട്ടെന്ന് ആക്രമിക്കുകയായിരുന്നു. ആക്രമണത്തെ തുടർന്ന് നിയന്ത്രണം നഷ്ടപ്പെട്ട വിമാനം സൗദി അറേബ്യയ്ക്ക് മുകളിൽ വെച്ച് പെട്ടെന്ന് ദിശ മാറുകയും, വെറും 30 സെക്കൻഡിനുള്ളിൽ 16,000 അടി താഴേക്ക് പതിക്കുകയും ചെയ്തു. വലിയൊരു ദുരന്തത്തിന്റെ വക്കിൽ നിന്നാണ് വിമാനം തലനാരിഴയ്ക്ക് രക്ഷപ്പെട്ടത്.
പരിക്കേറ്റിട്ടും ധീരമായി പോരാടിയ ക്യാപ്റ്റൻ കോക്ക്പിറ്റിന്റെ വാതിൽ തുറന്നതോടെ യാത്രക്കാർ ഉള്ളിൽ പ്രവേശിക്കുകയും കോ-പൈലറ്റിനെ കീഴ്പ്പെടുത്തുകയുമായിരുന്നു. തുടർന്ന് കേബിളുകൾ ഉപയോഗിച്ച് ഇയാളെ സീറ്റിൽ കെട്ടിയിട്ടു. ഈ സമയം വിമാനത്തിൽ യാത്രക്കാരായി ഉണ്ടായിരുന്ന ഫ്ലൈദുബായിലെ തന്നെ മറ്റ് രണ്ട് ഓഫ്-ഡ്യൂട്ടി പൈലറ്റുമാർ കോക്ക്പിറ്റിന്റെ നിയന്ത്രണം ഏറ്റെടുക്കുകയും വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കുകയും ചെയ്തു.
വിമാനം ഇസ്രായേലിൽ കൊണ്ടുപോയി ഇടിച്ചുതകർക്കാനായിരുന്നു തന്റെ ലക്ഷ്യമെന്ന് പ്രതി ചോദ്യം ചെയ്യലിൽ സമ്മതിച്ചതായി അന്വേഷണ ഉദ്യോഗസ്ഥർ വ്യക്തമാക്കി. അൽ-ഹമ്മാമി തന്റെ സോഷ്യൽ മീഡിയ അക്കൗണ്ടുകൾ വഴി അൽ-ഖ്വയ്ദ ഭീകരരുടെ ചിത്രങ്ങൾ വ്യാപകമായി പങ്കുവെച്ചിരുന്നതായി അന്വേഷണ ഏജൻസികൾ കണ്ടെത്തി. തീവ്ര ഇസ്ലാമിക പ്രത്യയശാസ്ത്രങ്ങൾ പ്രചരിപ്പിക്കുന്ന നിരോധിത വെബ്‌സൈറ്റുകൾ ഇയാൾ സ്ഥിരമായി സന്ദർശിച്ചിരുന്നതായും കടുത്ത തീവ്രവാദ ചിന്താഗതിക്കാരനായിരുന്നു ഇയാളെന്നും റിപ്പോർട്ടുകൾ വ്യക്തമാക്കുന്നു.
കോ-പൈലറ്റ് കടുത്ത തീവ്രവാദ പ്രത്യയശാസ്ത്രങ്ങൾക്ക് അടിമപ്പെട്ടിരുന്നതായി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പ്രതികരിച്ചു. സംഭവത്തിന് പിന്നിൽ ഏതെങ്കിലും തീവ്രവാദ സംഘടനകളുടെ ഗൂഢാലോചനയുണ്ടോ എന്ന് യു.എ.ഇയുടെ നേതൃത്വത്തിൽ സൗദി, ഇസ്രായേൽ എന്നീ രാജ്യങ്ങൾ സംയുക്തമായി അന്വേഷിച്ചുവരികയാണ്. വിമാന സുരക്ഷാ മാനദണ്ഡങ്ങളിൽ വരുത്തേണ്ട മാറ്റങ്ങളെക്കുറിച്ചും പൈലറ്റുമാരുടെ സുരക്ഷാ പരിശോധനകളെക്കുറിച്ചും അന്താരാഷ്ട്ര തലത്തിൽ വീണ്ടും ചർച്ചകൾക്ക് ഈ സംഭവം വഴിതുറന്നിട്ടുണ്ട്.
Mystery deepens surrounding the pilot who attempted to crash the plane.
