ടെൽ അവീവ്: അമേരിക്കയും ഇറാനും തമ്മിൽ സമാധാന ചർച്ചകൾ പുരോഗമിക്കുന്നതിനിടയിലും, ഇറാനെതിരെ വീണ്ടും സൈനിക നടപടിക്ക് ഇസ്രായേൽ സന്നദ്ധമാണെന്ന കടുത്ത മുന്നറിയിപ്പുമായി പ്രധാനമന്ത്രി ബെഞ്ചമിൻ നെതന്യാഹു. ഇറാൻ്റെ ആണവ പദ്ധതികളെ തടയാൻ ഇസ്രായേൽ സ്വതന്ത്രമായി തന്നെ മുന്നോട്ട് പോകുമെന്നും നയതന്ത്ര ചർച്ചകൾക്ക് തങ്ങളെ കെട്ടിയിടാനാകില്ലെന്നും അദ്ദേഹം വ്യക്തമാക്കി.
ഇസ്രായേലിൻ്റെ ‘ചാനൽ 14’-ന് നൽകിയ അഭിമുഖത്തിലാണ് നെതന്യാഹു തൻ്റെ നിലപാട് വ്യക്തമാക്കിയത്. മുൻപ് ഇറാനിൽ നടത്തിയ സൈനിക നീക്കങ്ങളെ ന്യായീകരിച്ച അദ്ദേഹം, ആവശ്യമെങ്കിൽ മൂന്നാമതൊരു ആക്രമണത്തിനും രാജ്യം മടിക്കില്ലെന്ന് പ്രഖ്യാപിച്ചു. ഇറാൻ്റെ ആണവ ഭീഷണിയിൽ നിന്ന് ഇസ്രായേലിനെ രക്ഷിക്കാൻ സ്വതന്ത്ര നടപടികൾ അനിവാര്യമാണെന്നാണ് നെതന്യാഹുവിൻ്റെ പക്ഷം.
അതേസമയം, ഖത്തറിൻ്റെ മധ്യസ്ഥതയിൽ അമേരിക്കയും ഇറാനും തമ്മിൽ താൽക്കാലിക വെടിനിർത്തൽ കരാർ വിപുലപ്പെടുത്താനുള്ള നിർണ്ണായക ചർച്ചകൾ നടക്കുന്നതിനിടയിലാണ് ഇസ്രായേലിൻ്റെ ഈ നീക്കം. ഹോർമുസ് കടലിടുക്ക് തുറക്കുക, ഉപരോധങ്ങൾ ലഘൂകരിക്കുക, ഇറാൻ്റെ ആണവ പ്രവർത്തനങ്ങളിൽ നിയന്ത്രണം കൊണ്ടുവരിക എന്നിവയാണ് യു.എസ്-ഇറാൻ ചർച്ചകളുടെ ലക്ഷ്യം. എന്നാൽ ഇറാൻ്റെ സൈനിക-ആണവ ശേഷി പൂർണ്ണമായി ഇല്ലാതാക്കാത്ത ഒരു കരാറും ഇസ്രായേൽ അംഗീകരിക്കില്ലെന്ന് നെതന്യാഹു ആവർത്തിച്ചു.’
അതിനിടെ, മേഖലയിൽ വീണ്ടുമൊരു യുദ്ധമുണ്ടാകുന്നത് തടയാൻ അമേരിക്കൻ പ്രസിഡൻ്റ് ഡോണൾഡ് ട്രംപ് ഇസ്രായേലിന് മേൽ ശക്തമായ സമ്മർദ്ദം ചെലുത്തുന്നതായാണ് റിപ്പോർട്ടുകൾ. വീണ്ടും വലിയ തോതിലുള്ള ആക്രമണങ്ങൾക്ക് മുതിർന്നാൽ അന്താരാഷ്ട്ര തലത്തിൽ ഇസ്രായേൽ നയതന്ത്രപരമായി ഒറ്റപ്പെടുമെന്ന് ട്രംപ് നെതന്യാഹുവിന് മുന്നറിയിപ്പ് നൽകിയതായി ‘ആക്സിയോസ്’ റിപ്പോർട്ട് ചെയ്തു. “ബിബി, നിങ്ങൾ കൂടുതൽ ശ്രദ്ധാലുവായിരിക്കുന്നതാണ് നല്ലത്, അല്ലെങ്കിൽ വൈകാതെ തന്നെ നിങ്ങൾ ഒറ്റയ്ക്കായേക്കാം,” എന്ന് ട്രംപ് പറഞ്ഞതായാണ് വിവരം.
എന്നാൽ, തെക്കൻ ലബനനിലെ ഇസ്രായേൽ സൈനിക നിയന്ത്രണത്തിലുള്ള പ്രദേശങ്ങൾ കഴിഞ്ഞ ദിവസം നെതന്യാഹു സന്ദർശിച്ചു. ബെയ്റൂട്ടുമായി ചില സുരക്ഷാ ധാരണകളിൽ എത്തിയിട്ടുണ്ടെങ്കിലും, ഹിസ്ബുള്ളയുടെ ഭീഷണി പൂർണ്ണമായി മാറുന്നത് വരെ തെക്കൻ ലബനനിൽ നിന്ന് ഇസ്രായേൽ സൈന്യം പിന്മാറില്ലെന്ന് അദ്ദേഹം സൈനികരോട് വ്യക്തമാക്കി. ലബനനിലെ ഹിസ്ബുള്ള കേന്ദ്രങ്ങൾക്ക് നേരെ ഇസ്രായേൽ നടത്തിയ വ്യോമാക്രമണത്തിന് പിന്നാലെ ഇറാൻ ഇസ്രായേലിന് നേരെ മിസൈൽ വർഷം നടത്തിയിരുന്നു. ഇതിന് തിരിച്ചടിയായി ഇസ്രായേൽ ഇറാനിലെ സൈനിക കേന്ദ്രങ്ങളും ആക്രമിച്ചിരുന്നു.
Netanyahu says he will not hesitate to attack Iran again; Fears of war in the Middle East despite US-Iran talks
