വാഷിങ്ടൺ: അമേരിക്ക ഇറാനിലെ ഖേഷം ദ്വീപിൽ ആക്രമണം നടത്തിയെന്ന റിപ്പോർട്ടുകൾക്കു പിന്നാലെ രാജ്യാന്തര വിപണിയിൽ എണ്ണവില ഉയർന്നു. യുഎസ് ഇടക്കാല തിരഞ്ഞെടുപ്പിന് തൊട്ടുമുമ്പാണ് തിങ്കളാഴ്ച രാത്രിയോടെ ആക്രമണം നടന്നതെന്നാണ് റിപ്പോർട്ട്. ചൊവ്വാഴ്ച ബ്രെന്റ് ക്രൂഡ് ഓയിൽ വില 1.75 ശതമാനം ഉയർന്ന് ബാരലിന് 106.60 ഡോളറിലെത്തി. വെസ്റ്റ് ടെക്സസ് ഇന്റർമീഡിയറ്റ് (WTI) ക്രൂഡ് വില 1.7 ശതമാനം വർധിച്ച് 98.10 ഡോളറിലുമെത്തി.
തിങ്കളാഴ്ച എണ്ണവിലയിൽ ഏഴു ശതമാനത്തിലേറെ ഇടിവുണ്ടായിരുന്നു. ഇറാൻ യുദ്ധത്തിന് നയതന്ത്ര പരിഹാരം കണ്ടെത്താൻ താൽപര്യമുണ്ടെന്ന് യുഎസ് പ്രസിഡന്റ് ഡോണൾഡ് ട്രംപും ഇറാൻ പ്രസിഡന്റും സൂചന നൽകിയതിനു പിന്നാലെയായിരുന്നു വിലയിടിവ്. എന്നാൽ, ഇടക്കാല തിരഞ്ഞെടുപ്പിന് ശേഷം ഇറാനെതിരെ കൂടുതൽ സൈനിക നടപടികൾക്ക് അമേരിക്ക മുതിർന്നേക്കുമെന്ന ആശങ്കയിൽ നേരത്തെ ബ്രെന്റ് ക്രൂഡ് വില 2022നു ശേഷമുള്ള ഏറ്റവും ഉയർന്ന നിലയിലെത്തിയിരുന്നു.
തിങ്കളാഴ്ച ഇറാനിലെ ഖേഷം ദ്വീപിൽ അമേരിക്ക ആക്രമണം നടത്തിയതായി യുഎസ് ഉദ്യോഗസ്ഥരെ ഉദ്ധരിച്ച് വാൾസ്ട്രീറ്റ് ജേണൽ റിപ്പോർട്ട് ചെയ്തിരുന്നു. ഏതാനും ആഴ്ചകളായി ഇറാനെതിരെ പരിമിതമായ സൈനിക ആക്രമണങ്ങൾ അമേരിക്ക നടത്തിയിട്ടുണ്ടെന്നും ഉദ്യോഗസ്ഥർ പറഞ്ഞു. സംഘർഷം കൂടുതൽ രൂക്ഷമാക്കാൻ അമേരിക്ക പദ്ധതിയിടുന്നുവെന്ന പ്രതീതി ഒഴിവാക്കാനാണ് സൈനിക നീക്കങ്ങൾ പരസ്യപ്പെടുത്താതെ നടത്തുന്നതെന്നും റിപ്പോർട്ടിൽ പറയുന്നു.
അതേസമയം, ചർച്ചകളിലൂടെ യുദ്ധം അവസാനിപ്പിക്കാനുള്ള സാധ്യതയെക്കുറിച്ച് ട്രംപ് ഭരണകൂടം ഇപ്പോഴും സംസാരിക്കുന്നുണ്ട്. ഇറാനുമായി ചർച്ചയിലൂടെ ധാരണയിലെത്താൻ കഴിയുമെന്ന പ്രതീക്ഷ തനിക്കും ട്രംപിനുമുണ്ടെന്ന് യുഎസ് വൈസ് പ്രസിഡന്റ് ജെ.ഡി. വാൻസ് സിഎൻഎന്നിനോട് പറഞ്ഞു. നയതന്ത്രത്തിലൂടെ യുദ്ധം അവസാനിപ്പിക്കാനാണ് ട്രംപ് ആഗ്രഹിക്കുന്നതെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയും വ്യക്തമാക്കി.
അമേരിക്കയിൽ എണ്ണവില ഉയരുന്നത് പണപ്പെരുപ്പത്തിനും പെട്രോൾ വില വർധനയ്ക്കും കാരണമാകുന്നുണ്ട്. ഇടക്കാല തിരഞ്ഞെടുപ്പ് അടുത്തിരിക്കെ ഇത് ട്രംപ് ഭരണകൂടത്തിന് ആശങ്കയാകുന്നു. പണപ്പെരുപ്പം നിയന്ത്രിക്കാൻ പലിശനിരക്ക് ഉയർത്തേണ്ടിവരുമെന്ന് കഴിഞ്ഞയാഴ്ച യുഎസ് ഫെഡറൽ റിസർവിലെ രണ്ട് ഉദ്യോഗസ്ഥർ മുന്നറിയിപ്പ് നൽകിയിരുന്നു. പലിശനിരക്ക് വർധിക്കുന്നത് സാമ്പത്തിക വളർച്ചയെ മന്ദഗതിയിലാക്കുകയും വായ്പാച്ചെലവ് ഉയർത്തുകയും ചെയ്യുമെങ്കിലും പണപ്പെരുപ്പം കുറയ്ക്കാൻ സഹായിക്കുമെന്നും സിഎൻബിസി റിപ്പോർട്ട് ചെയ്തു.
Oil prices rise over 1.7% after reported US strikes on Iran’s Qeshm Island ahead of midterms
