ന്യൂഡൽഹി: തമിഴ്നാട് മുഖ്യമന്ത്രിയായി അധികാരമേറ്റ ശേഷമുള്ള തൻ്റെ ആദ്യ ഔദ്യോഗിക ഡൽഹി സന്ദർശനത്തിനായി തമിഴക വെട്രി കഴകം അധ്യക്ഷൻ സി. ജോസഫ് വിജയ് ഇന്ന് തലസ്ഥാനത്തെത്തും. 2026 മേയ് 10-ന് മുഖ്യമന്ത്രിയായി സത്യപ്രതിജ്ഞ ചെയ്ത ശേഷമുള്ള അദ്ദേഹത്തിൻ്റെ ആദ്യ കേന്ദ്ര സന്ദർശനമാണിത്.
സന്ദർശനത്തിനിടെ മുഖ്യമന്ത്രി വിജയ് പ്രധാനമന്ത്രി നരേന്ദ്ര മോദിയുമായും വിവിധ കേന്ദ്രമന്ത്രിമാരുമായും നിർണായക കൂടിക്കാഴ്ചകൾ നടത്തും. തമിഴ്നാടിൻ്റെ വികസനത്തിന് ആവശ്യമായ സാമ്പത്തിക സഹായങ്ങളും വിവിധ കേന്ദ്ര പദ്ധതികളും അദ്ദേഹം കേന്ദ്ര സർക്കാരിന് മുന്നിൽ അവതരിപ്പിക്കും. കൂടാതെ, കർണാടകയുടെ മെകേദാതു അണക്കെട്ട് നിർമാണ റിപ്പോർട്ട് തള്ളിക്കളയണമെന്ന് ആവശ്യപ്പെട്ട് അദ്ദേഹം പ്രധാനമന്ത്രിക്ക് കത്ത് നൽകിയിട്ടുള്ള പശ്ചാത്തലത്തിൽ, ഈ വിഷയത്തിലെ സംസ്ഥാനത്തിൻ്റെ കടുത്ത വിയോജിപ്പും കൂടിക്കാഴ്ചയിൽ ഉന്നയിക്കും.
ഡൽഹിയിലെ ജവഹർലാൽ നെഹ്റു സർവകലാശാലയിൽ സ്ഥാപിച്ച പ്രശസ്ത തമിഴ് കവി തിരുവള്ളുവരിൻ്റെ പ്രതിമ മുഖ്യമന്ത്രി വിജയ് ഇന്ന് ഔദ്യോഗികമായി ഉദ്ഘാടനം ചെയ്യും. തമിഴ്നാട്ടിൽ ടി.വി.കെ നേതൃത്വം നൽകുന്ന സഖ്യ സർക്കാരിൻ്റെ ഭാഗമായ കോൺഗ്രസ് പാർട്ടിയുടെ ദേശീയ നേതാക്കളായ സോണിയ ഗാന്ധി, രാഹുൽ ഗാന്ധി എന്നിവരുമായും വിജയ് കൂടിക്കാഴ്ച നടത്തുമെന്ന് റിപ്പോർട്ടുകളുണ്ട്.
മേയിൽ നടന്ന നിയമസഭാ തിരഞ്ഞെടുപ്പിൽ ദ്രാവിഡ പാർട്ടികളുടെ ആധിപത്യം അവസാനിപ്പിച്ച് വലിയ ഒറ്റക്കക്ഷിയായാണ് വിജയ്യുടെ ടി.വി.കെ അധികാരത്തിലെത്തിയത്. സഖ്യകക്ഷികളുടെ പിന്തുണയോടെ മുഖ്യമന്ത്രിയായ വിജയ്യുടെ ഈ ആദ്യ ഡൽഹി സന്ദർശനത്തെ രാഷ്ട്രീയ കേന്ദ്രങ്ങൾ ഏറെ ഉറ്റുനോക്കുന്നു.
Tamil Nadu Chief Minister Vijay to visit Delhi for the first time after taking office; Will meet Prime Minister today, may meet Sonia and Rahul
