ന്യൂഡൽഹി: നീറ്റ് പരീക്ഷ ക്രമക്കേടിൽ വിദ്യാർഥികൾ നടത്തിയ വ്യാപക പ്രതിഷേധത്തിനൊടുവിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെച്ചതിനെ തുടർന്ന് കേന്ദ്ര സർക്കാരിനെതിരെ രൂക്ഷ വിമർശനവുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി. ഈ സർക്കാരിനെ പുറത്താക്കേണ്ട സമയം വന്നിരിക്കുന്നു എന്ന് രാഹുൽ വ്യക്തമാക്കി.
“ധർമേന്ദ്ര പ്രധാൻ രാജിവെച്ചത് നമ്മുടെ വിദ്യാഭ്യാസ സംവിധാനത്തെ പുനഃസംഘടിപ്പിക്കുന്നതിനുള്ള വലിയ ചുവടുവെപ്പാണ്. രാജ്യത്തുടനീളമുള്ള വിദ്യാർഥികൾക്ക് അഭിനന്ദനങ്ങൾ. ജനാധിപത്യത്തെയും ഭരണഘടനയെയും സ്വന്തം ഭാവിയെയും സംരക്ഷിക്കാൻ തെരുവിലിറങ്ങി ഉറച്ചുനിന്ന ഓരോ യുവാവിനും ഓരോ വിദ്യാർഥിക്കും ഹൃദയം നിറഞ്ഞ അഭിനന്ദനങ്ങൾ. നിങ്ങളെയെല്ലാം ഓർത്ത് അഭിമാനിക്കുന്നു,” എന്ന് രാഹൽ ഗാന്ധി എക്സിൽ (X) കുറിച്ചു.
എന്നാൽ രണ്ട് പ്രധാന ആവശ്യങ്ങൾ കൂടി ബാക്കിയുണ്ടെന്നും അദ്ദേഹം പറഞ്ഞു. വിദ്യാർഥികളെയും ഇന്ത്യയുടെ ഭാവിയെയും മാനിച്ച് പ്രധാനമന്ത്രി നരേന്ദ്ര മോദി മാപ്പ് പറയണമെന്നും, വിദ്യാർഥികൾക്കെതിരായ അക്രമത്തിന് ഉത്തരവാദികളായവർക്കെതിരെ കർശന നടപടി സ്വീകരിക്കണമെന്നും രാഹുൽ ആവശ്യപ്പെട്ടു. കർഷകരും തൊഴിലാളികളും സാധാരണക്കാരും ഉൾപ്പെടെ ഈ സർക്കാർ അടിച്ചമർത്തിയ സമൂഹത്തിലെ എല്ലാ വിഭാഗങ്ങൾക്കും ഭരണഘടനാപരമായ രീതിയിൽ സ്വന്തം അവകാശങ്ങൾക്കായി ഉറച്ചുനിൽക്കുകയാണ് യഥാർഥ ധൈര്യം. ഈ സർക്കാരിനെ പുറത്താക്കേണ്ട സമയം വന്നിരിക്കുന്നു. ഭയപ്പെടരുത് എന്നും രാഹുൽ ഗാന്ധി കൂട്ടിച്ചേർത്തു.
‘Time has come to remove this government’, Rahul Gandhi says as Dharmendra Pradhan resigns amid CJP protest
