ആശുപത്രിയില്‍ കഴിയുന്ന അച്ഛനെ സന്ദര്‍ശിക്കാനായി അമേരിക്കയില്‍ നിന്നെത്തിയ ഇളയ ദളപതിയുടെ ചിത്രമാണ് ആരാധകരിപ്പോള്‍ സോഷ്യല്‍മീഡിയയില്‍ വൈറലാക്കുന്നത്. പുതിയ സിനിമയുടെ വര്‍ക്കുകളുടെ ഭാഗമായാണ് നടന്‍ വിജയ് അമേരിക്കയിലുണ്ടായിരുന്നത്. ഹൃദയസംബന്ധമായ അസുഖത്തെ തുടര്‍ന്നുണ്ടായ ശസ്ത്രക്രിയയ്ക്കു ശേഷം വിശ്രമത്തില്‍ കഴിയുന്ന അച്ഛനെ സന്ദര്‍ശിക്കാനാണ് വിജയ് തിരിച്ചെത്തിയത്.
ആശുപത്രി മുറിയില്‍ അച്ഛന്‍ എസ്.എ. ചന്ദ്രശേഖറിനും അമ്മ ശോഭയ്ക്കുമൊപ്പമുള്ള വിജയ്യുടെ ചിത്രമാണ് വൈറലാകുന്നത്. ചന്ദ്രശേഖര്‍ തന്നെയാണ് ഈ ചിത്രം സമൂഹമാധ്യമങ്ങളിലൂെട പങ്കുവച്ചത്. ”കുടുംബബന്ധങ്ങളും വാത്സല്യവുമാണ് മനുഷ്യമനസ്സിന്റെ ഏറ്റവും വലിയ ഔഷധം.” എന്നായിരുന്നു ചന്ദ്രശേഖര്‍ ചിത്രത്തിനു നല്‍കിയ അടിക്കുറിപ്പ്.
നേരത്തെ വിജയ്യും അച്ഛനും തമ്മില്‍ ചില അസ്വാരസ്യങ്ങളുണ്ടെന്ന് തമിഴകത്ത് റിപ്പോര്‍ട്ടുകള്‍ വന്നിരുന്നു. വിജയ്യുടെ രാഷ്ട്രീയ പ്രവേശനവുമായി ബന്ധപ്പെട്ട കാര്യങ്ങളിലാണ് ഇരുവരും തമ്മില്‍ ഭിന്നാഭിപ്രായമുണ്ടായതെന്നും വാര്‍ത്ത വന്നിരുന്നു. പുതിയ സിനിമയുടെ തയാറെടുപ്പുകളുടെ ഭാഗമായി അമേരിക്കയിലായിരുന്ന വിജയ് കഴിഞ്ഞ ദിവസമാണ് ചെന്നൈയില്‍ തിരിച്ചെത്തിയത്. തിടുക്കപ്പെട്ടു വന്നതു തന്നെ അച്ഛനെ കാണാനായിരുന്നുവെന്നും വിജയ്യോട് അടുത്ത വൃത്തങ്ങള്‍ പറയുന്നു.
