സി.പി.എം. വിപുലീകൃത കണ്ണൂർ ജില്ലാ കമ്മിറ്റി യോഗത്തിൽ പ്രതിപക്ഷ നേതാവ് പിണറായി വിജയനും മകൾ ടി. വീണയ്ക്കുമെതിരേ പ്രതിനിധികളുടെ രൂക്ഷവിമർശനം. മകൾ വീണയെയും അവരുടെ കമ്പനിയെയും ന്യായീകരിക്കാൻ പാർട്ടിയുടെയും സംഘടനയുടെയും ഊർജവും സമയവും ചെലവഴിക്കുന്നത് തെറ്റാണെന്നും ഇത് പാർട്ടിയുടെ പതനത്തിന് കളമൊരുക്കുകയാണെന്നും പാനൂരിൽനിന്നുള്ള പ്രതിനിധി ഉൾപ്പെടെയുള്ളവർ കടുത്ത ഭാഷയിൽ വിമർശിച്ചു. വീണാ വിജയനെതിരെ അന്വേഷണം വന്നപ്പോൾ പാർട്ടി എന്തിനാണ് പ്രസ്താവനയിറക്കിയതെന്നും, കേസിൽ ഇത്തരത്തിൽ പ്രതിരോധം തീർക്കേണ്ട സാഹചര്യം എന്തായിരുന്നുവെന്നുമാണ് യോഗത്തിൽ പ്രധാനമായും ഉയർന്ന ചോദ്യം.
മുൻ മുഖ്യമന്ത്രി വി.എസ്. അച്യുതാനന്ദന്റെ മകൻ അരുൺകുമാർ വിവാദങ്ങളിൽ പെട്ടപ്പോഴും, അന്തരിച്ച മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ കേസിൽപ്പെട്ട് ജയിലിൽ കിടന്നപ്പോഴും പാർട്ടി അതിൽ ഉത്തരവാദിത്വമില്ലെന്നു പറഞ്ഞ് തള്ളുകയാണുണ്ടായത്. അന്ന് ആ നേതാക്കളും സമാനമായ നിലപാടല്ലേ സ്വീകരിച്ചതെന്നും പ്രതിനിധികൾ ചൂണ്ടിക്കാട്ടി. എന്നാൽ പിണറായിയുടെ മകളുടെ കാര്യം വരുമ്പോൾ മാത്രം പാർട്ടി നേരിട്ട് ഇടപെട്ട് പ്രതിരോധം തീർക്കുന്നതും മറ്റ് നേതാക്കളുടെ കുടുംബാംഗങ്ങളുടെ കേസുകളിൽ നിന്ന് വ്യത്യസ്തമായ സമീപനം സ്വീകരിക്കുന്നതും എന്തിനാണെന്ന് യോഗത്തിൽ ചോദ്യമുയർന്നു.
പ്രതിനിധികളുടെ വിമർശനങ്ങൾക്കും ചോദ്യങ്ങൾക്കും തന്റെ മറുപടി പ്രസംഗത്തിൽ പിണറായി വിജയൻ വിശദമായി മറുപടി നൽകി. പ്രസംഗത്തിന്റെ വലിയൊരു ഭാഗം ഈ വിമർശനങ്ങളെ പ്രതിരോധിക്കാനാണ് അദ്ദേഹം വിനിയോഗിച്ചത്. ലാവ്‌ലിൻ കേസ് മുതൽ തനിക്കെതിരായ പുതിയ വിജിലൻസ് കേസ് വരെയുള്ള സ്വന്തം അനുഭവങ്ങൾ യോഗത്തിൽ അക്കമിട്ട് നിരത്തിയ അദ്ദേഹം, തനിക്കെതിരായ കേസുകളെയും പാർട്ടിയുടെ നിലപാടുകളെയും ന്യായീകരിച്ചു. ഇതാണ് തന്റെ അസന്ദിഗ്ധമായ നിലപാടെന്നും അദ്ദേഹം വ്യക്തമാക്കി.
Fierce Criticism Against Pinarayi in Kannur Over Shielding Veena; Delegates Point Out Different Treatment Compared to VS and Kodiyeri
