തൃശൂർ പൂരത്തിനായി വെടിക്കെട്ട് സാമഗ്രികൾ നിർമ്മിക്കുന്ന മുണ്ടത്തിക്കോട്ടെ നിർമ്മാണശാലയിലുണ്ടായ വൻ സ്ഫോടനത്തിൽ ആറ് തൊഴിലാളികൾ കൊല്ലപ്പെട്ടെന്ന് സ്ഥിരീകരിച്ചു. തിരുവമ്പാടി വിഭാഗത്തിന്റെ വെടിക്കെട്ട് സാമഗ്രികൾ തയ്യാറാക്കുന്ന അഞ്ച് താത്ക്കാലിക പുരകളിലും തീ പടരുകയായിരുന്നു. അപകടത്തിൽ പരിക്കേറ്റ 13 പേരെ ഇതുവരെ ആശുപത്രിയിൽ പ്രവേശിപ്പിച്ചു. മരിച്ചവരുടെ ശരീരഭാഗങ്ങൾ സമീപത്തെ പാടത്തുനിന്നും കണ്ടെടുത്തതായാണ് വിവരം. സ്ഫോടനസമയത്ത് എത്രപേർ ജോലിയിലുണ്ടായിരുന്നു എന്നതിൽ വ്യക്തതയില്ലാത്തത് ആശങ്ക വർധിപ്പിക്കുന്നു.
സ്ഫോടനത്തെത്തുടർന്ന് പ്രദേശം പുകപടലങ്ങളാൽ നിറഞ്ഞത് രക്ഷാപ്രവർത്തനത്തിന് വലിയ തടസ്സം സൃഷ്ടിക്കുന്നുണ്ട്. തീ ഇനിയും പൂർണ്ണമായി നിയന്ത്രണവിധേയമാക്കാൻ സാധിച്ചിട്ടില്ല. പ്രദേശത്ത് വീണ്ടും ചെറിയ സ്ഫോടന ശബ്ദങ്ങൾ കേൾക്കുന്നതിനാൽ അഗ്നിശമനസേനയും പോലീസും അതീവ ജാഗ്രതയോടെയാണ് ഇടപെടുന്നത്. സ്ഫോടനത്തിന്റെ ആഘാതത്തിൽ വെടിക്കെട്ട് പുരകൾ പൂർണ്ണമായും തകർന്നു.
പരിക്കേറ്റവരിൽ പലരുടെയും നില അതീവ ഗുരുതരമാണ്. എത്രപേർ അപകടത്തിൽപ്പെട്ടിട്ടുണ്ടെന്ന കൃത്യമായ കണക്കെടുപ്പ് നടന്നുവരികയാണ്. പൂരത്തിന് ദിവസങ്ങൾ മാത്രം ബാക്കിനിൽക്കെ നടന്ന ഈ ദുരന്തം നാടിനെ നൊമ്പരത്തിലാഴ്ത്തി. സ്ഥലത്ത് ജില്ലാ ഭരണകൂടത്തിന്റെയും പോലീസിന്റെയും ഉന്നത ഉദ്യോഗസ്ഥർ ക്യാമ്പ് ചെയ്താണ് രക്ഷാപ്രവർത്തനങ്ങൾ ഏകോപിപ്പിക്കുന്നത്.
Five killed in major explosion at Thrissur Pooram fireworks manufacturing unit
