ബെർലിൻ: ലബനനിൽ കാലാവധി അവസാനിക്കാനിരിക്കുന്ന ഐക്യരാഷ്ട്രസഭയുടെ സമാധാന പരിപാലന ദൗത്യത്തിന് (യുഎൻഐഎഫ്ഐഎൽ) പകരമായി യൂറോപ്യൻ യൂണിയന്റെ (ഇയു) നേതൃത്വത്തിലുള്ള ഒരു സായുധ സേനയെ നിയോഗിക്കണമെന്ന് ജർമ്മൻ വിദേശകാര്യ മന്ത്രി ജോഹാൻ വാഡെഫുൾ. റെഡാക്ഷൻസ് നെറ്റ്വർക്ക് ഡച്ച്ലാൻഡിന് നൽകിയ അഭിമുഖത്തിലാണ് അദ്ദേഹം ഈ പുതിയ നിർദ്ദേശം മുന്നോട്ടുവെച്ചത്. 2026 ഡിസംബർ 31-ഓടെ നിലവിലെ യുഎൻ ദൗത്യത്തിന്റെ കാലാവധി അവസാനിക്കുകയാണ്.
യുഎൻ ദൗത്യം അവസാനിക്കുന്നതോടെ ലബനനിൽ ഒരു സുരക്ഷാ ശൂന്യത ഉണ്ടാകുന്നത് തടയാൻ യൂറോപ്യൻ യൂണിയന്റെ മേൽനോട്ടത്തിലുള്ള ഒരു സൈന്യത്തെ വിന്യസിക്കാൻ സാധിക്കുമോ എന്ന് ഇയു ഗൗരവമായി പരിശോധിക്കണമെന്ന് മന്ത്രി വ്യക്തമാക്കി. മേഖലയിൽ നിന്ന് ഇസ്രായേൽ സൈന്യത്തിന് പിന്മാറാൻ ആവശ്യമായ സുരക്ഷിതമായ സാഹചര്യം ഒരുക്കാൻ യൂറോപ്യൻ യൂണിയന്റെ സേനയ്ക്ക് സാധിക്കും. ഒപ്പം ഭീകര പ്രവർത്തനങ്ങളുമായി ഹിസ്ബുള്ള വീണ്ടും ഈ പ്രദേശത്തേക്ക് തിരിച്ചെത്തുന്നത് തടയാൻ ഇത്തരം ഒരു സുരക്ഷാ സംവിധാനത്തിന് കഴിയുമെന്നും ജർമ്മൻ വിദേശകാര്യ മന്ത്രി കൂട്ടിച്ചേർത്തു.
