ന്യൂഡൽഹിയിൽ നടന്ന പതിനൊന്നാമത് നീതി ആയോഗ് ഗവേണിങ് കൗൺസിൽ യോഗത്തിൽ പങ്കെടുക്കാനെത്തിയ തമിഴ്നാട് മുഖ്യമന്ത്രി സി. ജോസഫ് വിജയ് പ്രധാനമന്ത്രി നരേന്ദ്ര മോദിയുമായി പ്രത്യേക കൂടിക്കാഴ്ച നടത്തി. തമിഴ്നാടിന്റെ വികസന മുൻഗണനകളും ആവശ്യങ്ങളും സംരക്ഷിച്ചുകൊണ്ട് തന്നെ കേന്ദ്ര സർക്കാരുമായി പൂർണ്ണമായി സഹകരിച്ച് പ്രവർത്തിക്കാൻ തന്റെ സർക്കാർ തയ്യാറാണെന്ന് യോഗത്തിലെ പ്രസംഗത്തിൽ മുഖ്യമന്ത്രി വ്യക്തമാക്കി. വികസിത ഇന്ത്യ എന്ന ലക്ഷ്യം കൈവരിക്കാൻ സാധിക്കുന്നത് ശക്തമായ സഹകരണ ഫെഡറലിസത്തിലൂടെ മാത്രമാണെന്നും അദ്ദേഹം കൂട്ടിച്ചേർത്തു.
കേന്ദ്രവുമായി സഹകരിക്കുമെന്ന് വ്യക്തമാക്കുമ്പോഴും സംസ്ഥാനത്തിന്റെ താല്പര്യങ്ങൾ മുൻനിർത്തി മെഡിക്കൽ പ്രവേശനത്തിനുള്ള ‘നീറ്റ്’ (NEET) പരീക്ഷയോടുള്ള തമിഴ്നാടിന്റെ കടുത്ത എതിർപ്പ് നീതി ആയോഗ് യോഗത്തിലും വിജയ് ആവർത്തിച്ചു. മെഡിക്കൽ പ്രവേശനത്തിനായി പ്രത്യേക പരീക്ഷ നടത്തുന്നതിന് പകരം പന്ത്രണ്ടാം ക്ലാസ് പരീക്ഷയിലെ മാർക്കിന്റെ മാത്രം അടിസ്ഥാനത്തിൽ വിദ്യാർത്ഥികൾക്ക് പ്രവേശനം നൽകണമെന്നാണ് തമിഴ്നാടിന്റെ ആവശ്യമെന്ന് അദ്ദേഹം ഓർമ്മിപ്പിച്ചു. ഒപ്പം കേന്ദ്ര സർക്കാരിന്റെ ത്രിഭാഷാ നയത്തോടുള്ള വിയോജിപ്പും മുഖ്യമന്ത്രി യോഗത്തിൽ പരസ്യമായി ഉന്നയിച്ചു.
സംസ്ഥാനത്തെ വിദ്യാഭ്യാസ മേഖലയിലെ വികസന പ്രവർത്തനങ്ങളെ ബാധിക്കുന്ന തരത്തിൽ കേന്ദ്രം ഏർപ്പെടുത്തിയിട്ടുള്ള നിയന്ത്രണങ്ങൾക്കെതിരെയും തമിഴ്നാട് മുഖ്യമന്ത്രി രംഗത്തുവന്നു. സമഗ്ര ശിക്ഷാ പദ്ധതിയുമായി (SSA) ബന്ധപ്പെട്ട് സംസ്ഥാനത്തിന് ലഭിക്കേണ്ട ഫണ്ടുകൾ യാതൊരുവിധ നിബന്ധനകളോ നിയന്ത്രണങ്ങളോ കൂടാതെ അടിയന്തരമായി അനുവദിക്കണമെന്ന് അദ്ദേഹം കേന്ദ്ര സർക്കാരിനോട് ആവശ്യപ്പെട്ടു. തമിഴ്നാട്ടിൽ പുതിയ സർക്കാർ അധികാരമേറ്റതിന് ശേഷം മുഖ്യമന്ത്രി വിജയ്യും പ്രധാനമന്ത്രി നരേന്ദ്ര മോദിയും തമ്മിൽ നടത്തുന്ന പ്രധാനപ്പെട്ട ഔദ്യോഗിക കൂടിക്കാഴ്ചയാണിത്.
Tamil Nadu CM C. Joseph Vijay Meets PM Modi at NITI Aayog Session; Assures Cooperation While Opposing NEET
