അമേരിക്ക-ഇറാൻ സംഘർഷം ആകാശപ്പോരിൽ നിന്നും കടലിലേക്ക് രൂക്ഷമായി വ്യാപിക്കുന്നു. കഴിഞ്ഞ 24 മണിക്കൂറിനിടെ മേഖലയിൽ ഒൻപത് കപ്പലുകൾക്ക് നേരെയാണ് ഇരുവിഭാഗങ്ങളും രൂക്ഷമായ ആക്രമണം നടത്തിയത്. ഇറാന്റെ മൂന്ന് എണ്ണ ടാങ്കറുകൾ അമേരിക്കൻ സേന തകർത്തപ്പോൾ, അതിന് തിരിച്ചടിയായി അമേരിക്കൻ ബന്ധമുള്ളവ ഉൾപ്പെടെ ആറ് കപ്പലുകൾ ആക്രമിച്ചതായി ഇറാൻ അവകാശപ്പെട്ടു. യുദ്ധം ആരംഭിച്ച ശേഷം ഇതാദ്യമായാണ് ഇത്രയും വ്യാപകമായ കപ്പൽ ആക്രമണങ്ങൾ അരങ്ങേറുന്നത്.
ഖർഗ് ദ്വീപിന് സമീപം ആക്രമിച്ച ടാങ്കറിന് പുറമേ ജസക് മേഖലയിലെ എം.ടി സ്റ്റാർക്, ഒമാൻ കടലിൽ വെച്ച് എം.ടി കീലോ എന്നീ കപ്പലുകൾക്ക് നേരെയും അമേരിക്കൻ ആക്രമണമുണ്ടായി. ഇതിൽ എം.ടി കീലോ പൂർണ്ണമായി മുങ്ങിപ്പോയതായി സ്ഥിരീകരിച്ചിട്ടുണ്ട്. തങ്ങളുടെ പടക്കപ്പലുകളെ ലക്ഷ്യമിട്ടതിന് തിരിച്ചടിയായാണ് ഇറാന്റെ എണ്ണ ടാങ്കറുകൾ തകർത്തതെന്ന് അമേരിക്ക വ്യക്തമാക്കുമ്പോൾ, ഒൻപത് കപ്പലുകളെ ആക്രമിച്ച ഇറാൻ നീക്കം മേഖലയിലെ സൈനിക അന്തരീക്ഷം കൂടുതൽ ആപത്കരമാക്കി മാറ്റിയിരിക്കുകയാണ്.
അമേരിക്കൻ വിമാനവാഹിനിക്കപ്പലിനെയും മറ്റൊരു ചെറിയ പടക്കപ്പലിനെയും ആളില്ലാ ബോട്ടിനെയും ആക്രമിച്ചതായി ഇറാൻ അവകാശപ്പെട്ടെങ്കിലും ആളപായമില്ലെന്ന് യു.എസ് സ്ഥിരീകരിച്ചു. അതേസമയം, ഹോർമൂസ് ഇടുക്കിലൂടെയും സമീപ പ്രദേശങ്ങളിലൂടെയും സഞ്ചരിക്കുന്ന കപ്പലുകൾക്ക് നേരെ ഇറാൻ നടത്തുന്ന ഓരോ ആക്രമണത്തിനും തുല്യമായ അളവിൽ തിരിച്ചടി നൽകുമെന്ന് അമേരിക്ക മുന്നറിയിപ്പ് നൽകിയിട്ടുണ്ട്. പരസ്പരമുള്ള ഇത്തരം പോരാട്ടങ്ങൾ അന്താരാഷ്ട്ര നാവികരുടെയും വ്യാപാരക്കപ്പലുകളുടെയും സുരക്ഷയ്ക്ക് കടുത്ത ഭീഷണിയാണ് സൃഷ്ടിക്കുന്നത്.
US-Iran Military Conflict Escalates at Sea: 9 Vessels Targeted in 24 Hours
