ന്യൂഡൽഹി/തിരുവനന്തപുരം: കേരള നിയമസഭാ തിരഞ്ഞെടുപ്പിൽ യു.ഡി.എഫ് നേടിയ ഉജ്ജ്വല വിജയത്തിന് പിന്നാലെ, സംസ്ഥാനത്തിൻ്റെ അടുത്ത മുഖ്യമന്ത്രിയെ തീരുമാനിക്കാനുള്ള നിർണായക ചർച്ചകൾ ഇന്ന് ഡൽഹിയിൽ നടക്കും. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ നേതൃത്വത്തിലാണ് യോഗം ചേരുക. യോഗത്തിൽ രാഹുൽ ഗാന്ധിയും കെസി വേണുഗോപാലും ഉൾപ്പെടെയുള്ള മുതിർന്ന നേതാക്കൾ പങ്കെടുക്കും.
പ്രതിപക്ഷ നേതാവെന്ന നിലയിൽ തിരഞ്ഞെടുപ്പ് വിജയത്തിൽ നിർണായക പങ്ക് വഹിച്ച വി.ഡി. സതീശനാണ് മുഖ്യമന്ത്രി സ്ഥാനത്തേക്ക് ഏറ്റവും കൂടുതൽ സാധ്യത കൽപ്പിക്കപ്പെടുന്നത്. എന്നാൽ ഹൈക്കമാൻഡുമായുള്ള അടുത്ത ബന്ധവും ദേശീയ രാഷ്ട്രീയത്തിലെ പരിചയസമ്പത്തും കെ.സി. വേണുഗോപാലിനും അനുകൂല ഘടകമാണ്. മുതിർന്ന നേതാവ് രമേശ് ചെന്നിത്തലയുടെ പേരും ചർച്ചകളിലുണ്ട്.
എം.എൽ.എമാരുടെ അഭിപ്രായം തേടുന്നതിനായി ഹൈക്കമാൻഡ് പ്രത്യേക നിരീക്ഷകരെ നാളെ കേരളത്തിലേക്ക് അയക്കും. മുസ്ലിം ലീഗ് ഉൾപ്പെടെയുള്ള ഘടകകക്ഷികളുമായി കോൺഗ്രസ് നേതൃത്വം പ്രാഥമിക ചർച്ചകൾ പൂർത്തിയാക്കി. കോൺഗ്രസ് എടുക്കുന്ന തീരുമാനത്തെ പിന്തുണയ്ക്കാനാണ് ലീഗിൻ്റെ നീക്കം. കോൺഗ്രസ് ഒറ്റയ്ക്ക് 63 സീറ്റുകൾ നേടിയതിനാൽ ഘടകകക്ഷികളുടെ സമ്മർദ്ദത്തിന് വഴങ്ങേണ്ട സാഹചര്യം പാർട്ടിക്ക് നിലവിലില്ല.
മുഖ്യമന്ത്രിയുടെ കാര്യത്തിൽ തീരുമാനമായാൽ ഈ വാരം തന്നെ രാജ്ഭവനിൽ സത്യപ്രതിജ്ഞാ ചടങ്ങുകൾ നടന്നേക്കും. പത്ത് വർഷത്തെ എൽ.ഡി.എഫ് ഭരണത്തിന് അന്ത്യം കുറിച്ച് 102 സീറ്റുകളുടെ വൻ ഭൂരിപക്ഷവുമായാണ് യു.ഡി.എഫ് അധികാരത്തിലേക്ക് തിരിച്ചെത്തുന്നത്. വികസനവും ഭരണമാറ്റവും ചർച്ചയായ തിരഞ്ഞെടുപ്പിൽ ജനങ്ങൾ യു.ഡി.എഫിനെ കൈവിടാതെ കൂടെനിന്നു. അതിനിടെ ഇന്നലെ രാത്രിതന്നെ മുഖ്യമന്ത്രി പിണറായി വിജയൻ ഗവർണർക്ക് രാജിക്കത്ത് നൽകിയിരുന്നു.
Who should be the Chief Minister? High command seeks MLAs’ stand in Kerala
