ഡല്ഹി: മദ്യനയക്കേസില് അറസ്റ്റിലായി ജയിലില് കഴിയുന്ന മുന് ഡല്ഹി ഉപമുഖ്യമന്ത്രി മനീഷ് സിസോദിയയുടെ ജാമ്യാപേക്ഷ സുപ്രീംകോടതി തള്ളി. വിചാരണ മൂന്ന് മാസത്തിനുള്ളില് പൂര്ത്തിയാക്കുമെന്നത് കണക്കിലെടുത്താണ് തീരുമാനം. ആറ് മുതല് എട്ട് മാസത്തിനുള്ളില് വിചാരണ പൂര്ത്തിയാക്കുമെന്ന് ഇഡിയും സിബിഐയും ഉറപ്പുനല്കിയിട്ടുണ്ടെന്നും വിചാരണ മന്ദഗതിയിലാണെന്ന് ബോധ്യപ്പെടുകയോ അതിലും മുന്നോട്ടുപോവുകയോ ചെയ്താല് സിസോദിയക്ക് വീണ്ടും ജാമ്യത്തിനായി സുപ്രീംകോടതിയെ സമീപിക്കാവുന്നതാണെന്നും ബെഞ്ച് വ്യക്തമാക്കി.
ഇഡി, സിബിഐ കേസുകളില് സമര്പ്പിച്ച ജാമ്യാപേക്ഷയാണ് സുപ്രീംകോടതി തള്ളിയത്. ജസ്റ്റിസുമാരായ സഞ്ജീവ് ഖന്ന, എസ് വി എന് ഭട്ടി എന്നിവരടങ്ങിയ ബെഞ്ചാണ് ജാമ്യാപേക്ഷ പരിഗണിച്ചത്. കഴിഞ്ഞ ഫെബ്രുവരി 26നാണ് മദ്യനയക്കേസില് സിസോദിയയെ സിബിഐ അറസ്റ്റ് ചെയ്തത്. ചില മദ്യവ്യാപാരികള്ക്ക് അനുകൂലമാകുന്നത തരത്തില് ഡല്ഹിയുടെ പുതിയ മദ്യനയം രൂപീകരിച്ചു നടപ്പാക്കിയെന്നാണ് കേസ്. ക്രമക്കേട് ആരോപിക്കപ്പെടുന്ന എക്സൈസ് വകുപ്പിന്റെ ചുമതല സിസോദിയയ്ക്കായിരുന്നു. വിവാദമായ സാഹചര്യത്തില് പുതിയ നയം പിന്വലിച്ചിരുന്നു.
ആഗസ്ത് 17 നാണു മനീഷ് സിസോദിയ ഉള്പ്പെടെയുള്ളവരെ പ്രതി ചേര്ത്ത് എഫ്ഐആര് ഇട്ടത്. അഴിമതിക്കേസ് സിബിഐയും സാമ്പത്തിക ക്രമക്കേട് ഇഡിയുമാണ് അന്വേഷിക്കുന്നത്. റിമാന്ഡ് ചെയ്യേണ്ട സാഹചര്യം വ്യക്തമാക്കണമെന്ന് കോടതി അന്വേഷണ ഏജന്സികളോട് പറഞ്ഞിരുന്നു. ഇക്കാര്യത്തില് പരാജയപ്പെട്ടാല് ജാമ്യം അനുവദിക്കുമെന്നും കോടതി നേരത്തെ പറഞ്ഞിരുന്നു.
