ഡൽഹിയിൽ നിന്ന് പഞ്ചാബിലെ അമൃത്സറിലേക്ക് പുറപ്പെട്ട എയർ ഇന്ത്യ വിമാനം അബദ്ധത്തിൽ പാകിസ്താൻ വ്യോമാതിർത്തിയിൽ പ്രവേശിച്ചു. ജൂൺ 22-ന് നടന്ന സംഭവത്തിൽ വിമാനത്തിന് അന്താരാഷ്ട്ര അതിർത്തി ലംഘനം ഉണ്ടായതായി റിപ്പോർട്ടുകൾ സ്ഥിരീകരിച്ചു. സാങ്കേതിക കാരണങ്ങളാൽ ദിശ നഷ്ടപ്പെട്ടതാണ് അതിർത്തി ലംഘനത്തിന് കാരണമായതെന്നാണ് പ്രാഥമിക വിവരം. അമൃത്സർ വിമാനത്താവളത്തിൽ ഇറങ്ങുന്നതിന് മുന്നോടിയായി പൈലറ്റ് നടത്തിയ ‘ഗോ-എറൗണ്ട്’ പ്രക്രിയയ്ക്കിടയിലാണ് ഈ ചെറിയ വീഴ്ച സംഭവിച്ചതെന്ന് എയർ ഇന്ത്യ പ്രസ്താവനയിലൂടെ വ്യക്തമാക്കി.
എയർ ട്രാഫിക് കൺട്രോളിൽ (എടിസി) നിന്നുള്ള നിർദ്ദേശങ്ങൾ പിന്തുടരുന്നതിനിടയിലാണ് വിമാനം അന്താരാഷ്ട്ര അതിർത്തി കടന്നത്. പാകിസ്ഥാൻ അതിർത്തിയിൽ പ്രവേശിച്ച ഉടൻ തന്നെ പൈലറ്റ് സ്ഥിതി മനസ്സിലാക്കുകയും വിമാനം പെട്ടെന്ന് തന്നെ തിരിച്ചുവിട്ട് ഇന്ത്യൻ അതിർത്തിയിലേക്ക് സുരക്ഷിതമായി പ്രവേശിപ്പിക്കുകയും ചെയ്തു. എന്നാൽ തുടർന്ന് സുരക്ഷാ മുൻകരുതലുകളുടെ ഭാഗമായി വിമാനം അമൃത്സറിൽ ഇറക്കാതെ തിരികെ ഡൽഹിയിലേക്ക് തന്നെ കൊണ്ടുപോയി ലാൻഡ് ചെയ്യിക്കുകയായിരുന്നു. സംഭവത്തിൽ യാത്രാ സുരക്ഷയ്ക്ക് യാതൊരുവിധ ഭീഷണിയും ഉണ്ടായിട്ടില്ലെന്നാണ് ലഭ്യമാകുന്ന വിവരം.
സംഭവവുമായി ബന്ധപ്പെട്ട് വ്യോമയാന മന്ത്രാലയത്തിന് കീഴിലുള്ള ഡിജിസിഎയെ കാര്യങ്ങൾ ബോധ്യപ്പെടുത്തിയിട്ടുണ്ടെന്നും ഇതിനകം തന്നെ ആഭ്യന്തര അന്വേഷണം ആരംഭിച്ചതായും എയർ ഇന്ത്യ അറിയിച്ചു. ബന്ധപ്പെട്ട മറ്റ് സുരക്ഷാ ഏജൻസികളെയും വിവരം അറിയിച്ചിട്ടുണ്ട്. യാത്രക്കാരുടെയും ക്രൂ അംഗങ്ങളുടെയും സുരക്ഷയ്ക്കാണ് തങ്ങൾ എപ്പോഴും പ്രഥമ പരിഗണന നൽകുന്നതെന്നും സംഭവത്തെക്കുറിച്ച് വിശദമായി അന്വേഷണം നടത്തിവരികയാണെന്നും വിമാനക്കമ്പനി കൂട്ടിച്ചേർത്തു.
Air India Flight Accidentally Enters Pakistan Airspace During Go-Around; Internal Probe Initiated
