ദില്ലി: ഔദ്യോഗിക പ്രതിഷേധ വേദി പട്ടികയിൽ നിന്ന് ഒഴിവാക്കിയതിനെ തുടർന്ന് ദില്ലി പൊലീസ് അടച്ചുപൂട്ടിയ ജന്തർ മന്തറിൽ മിന്നൽ സമരം നടത്തിയ സി.ജെ.പി (സിറ്റിസൺസ് ഫോർ ജസ്റ്റിസ് ആൻഡ് പീസ്) നേതാക്കൾക്കെതിരെ പൊലീസ് കേസെടുത്തു. നിരോധനാജ്ഞയും ജാമ്യവ്യവസ്ഥകളും ലംഘിച്ച് ജന്തർ മന്തറിലേക്ക് അതിക്രമിച്ച് കയറിയെന്നാരോപിച്ചാണ് സി.ജെ.പി നേതാക്കളായ സൗരവ് ദാസ്, അശുതോഷ് റാങ്ക എന്നിവർക്കെതിരെ കേസെടുത്തത്. ദില്ലി പൊലീസിന്റെയും അർദ്ധസൈനിക വിഭാഗങ്ങളുടെയും കണ്ണ് വെട്ടിച്ച് പാർലമെന്റ് സ്ട്രീറ്റിന് സമീപമുള്ള മതിൽ ചാടിക്കടന്നായിരുന്നു പ്രവർത്തകരുടെ മിന്നൽ പ്രതിഷേധം. രാവിലെ കസ്റ്റഡിയിലെടുത്ത മറ്റുള്ളവരെ വിട്ടയച്ചെങ്കിലും പ്രധാന നേതാക്കളെ ഇനിയും മോചിപ്പിച്ചിട്ടില്ല.
നേതാക്കളെ കസ്റ്റഡിയിലെടുത്ത നടപടിയിലും ജന്തർ മന്തർ അടച്ചുപൂട്ടിയതിലും പ്രതിഷേധിച്ച് സമരം ശക്തമാക്കുമെന്ന് സി.ജെ.പി കൺവീനർ അഭിജീത് ദീപ്കെ വ്യക്തമാക്കി. പിടിയിലായ നേതാക്കൾക്ക് അഭിഭാഷകരെ കാണാൻ പോലും അനുവാദം നൽകിയിട്ടില്ലെന്നും, ദില്ലി പൊലീസ് കേന്ദ്ര ആഭ്യന്തര മന്ത്രിക്കു വേണ്ടി തട്ടിയെടുക്കൽ സംഘത്തെപ്പോലെയാണ് പ്രവർത്തിക്കുന്നതെന്നും അദ്ദേഹം രൂക്ഷമായി വിമർശിച്ചു. സമരം ചെയ്യുന്നവർക്കിടയിൽ ഭിന്നിപ്പുണ്ടാക്കാൻ വലിയ ശ്രമങ്ങൾ നടക്കുന്നുണ്ടെന്നും, അത്തരക്കാരെ തിരിച്ചറിയണമെന്നും ദീപ്കെ മുന്നറിയിപ്പ് നൽകി. ഭരണകൂടത്തിനെതിരെ പോരാടുന്നവരുടെ ശ്രദ്ധ തിരിക്കാനാണ് ശ്രമമെന്നും, തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജിയാണ് പ്രധാന ലക്ഷ്യമെന്നും അദ്ദേഹം കൂട്ടിച്ചേർത്തു.
അതേസമയം, ജന്തർ മന്തർ സമരവേദിയായി നിലനിർത്തണമെന്ന ആവശ്യത്തിൽ നിന്ന് പിന്നോട്ടില്ലെന്ന് സി.പി.എം ആസ്ഥാനത്ത് ചേർന്ന വാർത്താസമ്മേളനത്തിൽ സി.ജെ.പി പ്രതിനിധികൾ വ്യക്തമാക്കി. ഇതോടൊപ്പം പ്രതിപക്ഷ വിദ്യാർത്ഥി-യുവജന സംഘടനകളും ദില്ലിയിൽ പ്രതിഷേധം കടുപ്പിക്കുകയാണ്. കൊണാട്ട് പ്ലേസിൽ എൻ.എസ്.യു.ഐ ദേശീയ അധ്യക്ഷൻ വിനോദ് ജാക്കറിന്റെ നേതൃത്വത്തിൽ റോഡ് ഉപരോധിച്ച് പ്രതിഷേധിച്ച പ്രവർത്തകരെയും, ജൻപഥിൽ പ്രതിഷേധിച്ച എ.ഐ.എസ്.എഫ്, എ.ഐ.വൈ.എഫ്, ദിശ പ്രവർത്തകരെയും പൊലീസ് ബലം പ്രയോഗിച്ച് കസ്റ്റഡിയിലെടുത്തു. കൊണാട്ട് പ്ലേസിലെ ബാരിക്കേഡുകൾ മാറ്റാൻ പ്രവർത്തകർ ശ്രമിച്ചത് പ്രദേശത്ത് വലിയ സംഘർഷാവസ്ഥ സൃഷ്ടിച്ചു.
Flash Protest at Jantar Mantar: CJP Leaders Booked and Detained; Convener Abhijit Deepke Warns of Intensified Stir
