ന്യൂജഴ്സി: ഫിഫ ലോകകപ്പ് 2026 ഫൈനൽ ഇന്ന് (ജൂലൈ 19) അമേരിക്കയിലെ ന്യൂജഴ്സിയിലെ മെറ്റ്ലൈഫ് സ്റ്റേഡിയത്തിൽ നടക്കും. സ്പെയിനും അർജന്റീനയും തമ്മിലുള്ള കലാശപ്പോരിന് മുന്നോടിയായി വർണാഭമായ സമാപനച്ചടങ്ങും ലോകകപ്പ് ചരിത്രത്തിലാദ്യമായി ഹാഫ്ടൈം സംഗീതപരിപാടിയും അരങ്ങേറും.
ഫൈനൽ എപ്പോൾ?
സ്പെയിനും അർജന്റീനയും തമ്മിലുള്ള ഫൈനൽ മത്സരം ന്യൂജഴ്സിയിലെ ഈസ്റ്റ് റതർഫോർഡിലുള്ള മെറ്റ്ലൈഫ് സ്റ്റേഡിയത്തിൽ പ്രാദേശിക സമയം വൈകിട്ട് 3 മണിക്കാണ് (GMT 7.00 pm) (ഇന്ത്യൻ സമയം- ജൂലൈ 20-ന് പുലർച്ചെ 12.30-ന്) ആരംഭിക്കുക. ടൂർണമെന്റിനായി ഈ സ്റ്റേഡിയത്തിന് താൽക്കാലികമായി ന്യൂയോർക്ക്–ന്യൂജഴ്സി സ്റ്റേഡിയം എന്ന പേരാണ് നൽകിയിരിക്കുന്നത്. 82,500 കാണികളെ ഉൾക്കൊള്ളാൻ ശേഷിയുള്ള സ്റ്റേഡിയമാണിത്. 2025 ഫിഫ ക്ലബ് ലോകകപ്പ് ഫൈനലിനും രണ്ട് സെമിഫൈനലുകൾക്കും ഈ വേദി ആതിഥേയത്വം വഹിച്ചിരുന്നു.
സമാപനച്ചടങ്ങ് എപ്പോൾ?
മത്സരം തുടങ്ങുന്നതിന് ഒന്നര മണിക്കൂർ മുമ്പ്, പ്രാദേശിക സമയം ഉച്ചയ്ക്ക് 1.30-ന് (GMT 5.30 pm) സമാപനച്ചടങ്ങ് ആരംഭിക്കുക. അമേരിക്കൻ ഗായിക ജെന്നിഫർ ഹഡ്സൺ യുഎസ് ദേശീയഗാനം ആലപിക്കും. അമേരിക്ക, കാനഡ, മെക്സിക്കോ എന്നീ മൂന്ന് ആതിഥേയ രാജ്യങ്ങളിലായി 16 നഗരങ്ങളിൽ നടന്ന ടൂർണമെന്റിൽ പങ്കെടുത്ത 48 ടീമുകളെ ആദരിക്കുന്ന ചടങ്ങായിരിക്കും ഇത്.
ലോകകപ്പിൽ ആദ്യമായി ഹാഫ്ടൈം ഷോ
ലോകകപ്പ് ഫൈനൽ ചരിത്രത്തിലാദ്യമായാണ് ഹാഫ്ടൈം സംഗീതപരിപാടി സംഘടിപ്പിക്കുന്നത്. ആദ്യ പകുതി അവസാനിച്ചതിന് ശേഷം ഏകദേശം പ്രാദേശിക സമയം 3.45-ഓടെ പരിപാടി ആരംഭിക്കുമെന്നാണ് പ്രതീക്ഷ. ഏകദേശം 11 മിനിറ്റാണ് പ്രകടനത്തിന്റെ ദൈർഘ്യമെങ്കിലും വേദി ഒരുക്കുന്നതിനും മാറ്റുന്നതിനുമായി ഇടവേള 20 മുതൽ 25 മിനിറ്റ് വരെ നീട്ടാൻ സാധ്യതയുണ്ടെന്നാണ് റിപ്പോർട്ടുകൾ. സാധാരണ ഫുട്ബോൾ നിയമപ്രകാരം ഹാഫ്ടൈം 15 മിനിറ്റാണ്.
സമാപനച്ചടങ്ങിന് വേദിയിലെത്തുന്നവർ
സമാപനച്ചടങ്ങിന് അമേരിക്കൻ റാപ്പർ-ഗായകൻ പോസ്റ്റ് മലോൺ നേതൃത്വം നൽകും. അദ്ദേഹത്തിനൊപ്പം ഇറ്റാലിയൻ ഗായിക ലോറ പൗസിനി, അമേരിക്കൻ ഗായിക നിക്കോൾ ഷെർസിംഗർ, ബ്രിട്ടീഷ് പോപ് താരം റോബി വില്യംസ്, യൂട്യൂബ് താരം ഐഷോസ്പീഡ് എന്നിവരും പരിപാടിയുടെ ഭാഗമാകും. ഹോളിവുഡ് താരം ടോം ക്രൂസും പ്രത്യേക അതിഥിയായി പങ്കെടുക്കും.
ഹാഫ്ടൈം ഷോയിലെ വമ്പൻ താരനിര
ഹാഫ്ടൈം ഷോയ്ക്ക് കനേഡിയൻ പോപ് താരം ജസ്റ്റിൻ ബീബർ നേതൃത്വം നൽകും. അദ്ദേഹത്തോടൊപ്പം മഡോണ, ഷക്കീറ, ദക്ഷിണ കൊറിയൻ സംഗീതസംഘം BTS, നൈജീരിയൻ ഗായകൻ ബർണ ബോയ്, വെനസ്വേലയിലെ പ്രശസ്ത സംഗീതസംവിധായകൻ ഗുസ്താവോ ഡുഡാമെൽ, ന്യൂയോർക്കിലെ PS22 കോറസ് എന്നിവരും വേദിയിലെത്തും. കോൾഡ്പ്ലേ ബാൻഡിന്റെ മുഖ്യഗായകൻ ക്രിസ് മാർട്ടിൻ ആണ് പരിപാടിയുടെ ക്രിയേറ്റീവ് ഡയറക്ടർ.
വിദ്യാഭ്യാസത്തിനായി ഫണ്ട് സമാഹരണം
ഹാഫ്ടൈം ഷോയിലൂടെ FIFA Global Citizen Education Fund-നായി 100 മില്യൺ ഡോളർ സമാഹരിക്കുകയാണ് ലക്ഷ്യം. ലോകമെമ്പാടുമുള്ള കുട്ടികൾക്ക് വിദ്യാഭ്യാസം ലഭ്യമാക്കാൻ ഈ ഫണ്ട് ഉപയോഗിക്കുമെന്ന് ഫിഫ അറിയിച്ചു.”ലോകത്തെ ഒന്നിപ്പിക്കാൻ ലോകകപ്പിനുള്ള ശക്തി മറ്റൊന്നിനുമില്ല. ഈ ഹാഫ്ടൈം ഷോയുടെ ഭാഗമാകുന്നതിൽ അഭിമാനമുണ്ട്. അതിലൂടെ കുട്ടികളുടെ വിദ്യാഭ്യാസത്തിന് സഹായമാകുന്നതിൽ കൂടുതൽ സന്തോഷമുണ്ട്,” ജസ്റ്റിൻ ബീബർ പ്രസ്താവനയിൽ പറഞ്ഞു.
മത്സരം എവിടെ കാണാം?
അമേരിക്കയിൽ FOX, Telemundo, Universo ചാനലുകളിലും FOX Sports, FOX One, Peacock സ്ട്രീമിങ് പ്ലാറ്റ്ഫോമുകളിലും മത്സരം തത്സമയം കാണാം. കാനഡയിൽ CTV, TSN, മെക്സിക്കോയിൽ TelevisaUnivision, TV Azteca, ViX എന്നിവ സംപ്രേഷണം ചെയ്യും. പശ്ചിമേഷ്യയിലും ഉത്തരാഫ്രിക്കയിലും beIN Sports മത്സരം തത്സമയം സംപ്രേഷണം ചെയ്യും.
World Cup 2026 final: Closing ceremony and half-time show – what to know
